Înîsiyatîfa Azadî Ji Bo Girtiyên Nexweş di daxuyaniya vê heftî de bal kişandin ser rewşa girtiyê nexweş Ozgur Azad Încî û diyar kirin ku şert û mercên girtîgehê nexweşiya şîzofreniyê ya Ozgur Azad Încî girantir dike û daxwaza berdana wî kir.
Înîsiyatîfa Azadî Ji Bo Girtiyên Nexweş di hefteyê 603an de ji bo balê bikşînê ser rewşa girtiyên nexweş û binpêkirinên mafan li girtîgehan li Cadeya Sakarya ya Enqereyê daxuyanî da. Di daxuyaniyê de pankarta li ser, “Tedawî maf e, nayê astengkirin û girtiyên nexweş bila bên berdan” dinivisî hat hilgirtin. Endam û nûnerên însiyatîfe jî di daxuyaniyê de cih girtin û dirûşma “Tecrîd îşkence ye bila bi dawî bibe” hat berzkirin. Însiyatîfê di daxuyaniya vê hefteyê de bal kişand ser rewşa girtiyê nexweş Ozgur Azad Încî yê ku di Girtîgeha Ewlekariya Bilind a Kirşehîrê de tê ragirtin.
Metna daxuyaniyê ji aliyê Rêveberê Komeleya Mafê Mirovan (ÎHD) Bariş Barişik ve hat xwendin. Bariş Barişik diyar kir ku li gor daneyên ÎHDê di girtîgehan de 335 jê girtiyên rewşa wan giran e û hezar 412 girtiyên nexweş hene û 230 girtiyên nexweş jî bi tenê serê xwe nikarin bimînin û tedawiya xwe bikin. Bariş Barişik anî ziman ku girtiyên nexweş nayên dermankirin û ev yek dibe sedema binpêkirina mafê jiyanî.
‘Şert û mercên girtîgehê rewşa Ozgur Azad Încî girantir dike’
Bariş Barişik bi lêv kir ku Ozgur Azad Încî 26 sal in girtî ye û gelek caran sirgûnî girtîgehên cuda hatiye kirin. Bariş Barişik destnîşan kir ku tevî nexweşiyan jî Ozgur Azad Încî nayê berdan û wiha got: “Di sala 2007an de ji bo Azad Încî nexweşiya şîzofrenî hatiye tespîtkirin û ji wê rojê ve dermanên derûniyê bikar tîne. Lê tecrîd û şert û mercên girtîgehê nexweşiya wî girantir kiriye. Tevî vê yekê jî Azad Încî dema sewqî nexweşxaneya Lêkolînê ya Dewletê ya Kirşehîrê hatiyê kirin rapora ‘Dikare di girtîgehê de bimînê’ hatiye dayin. Ew yek jî nişan dide ku nexweşiya wî paşguh kirin e. Her wiha Ozgur Azad Încî sewqî Saziya Tipa Edlî jî hatiyê kirin û li wir jî nexweşiya wî paşguh kirin e. Sedema giranbûna nexweşiya Azad Încî yek jî şert û mercên girtîgehê ne. Azad Încî ji bilî 2 kesên pê re ragirtî ne nikare kesî bibînê û dernakeve cihê hewastendinê. Her wiha ava paqij a girtiyan nîn e û ev jî dibe sedem ku nekarin paqijiya xwe bi rêk û pêk bikin. Divê Ozgur Azad Încî li nexweşxaneyê were tedawîkirin. Her wiha divê nexweşiya Ozgur Azad Încî li ber çavan bê girtin bê berdan. Heke tiştek neyînî bibe berpirs rêyedarên ku rewşa Ozgur Azad Încî paşguh dikin e.”
Daxuyanî bi berzkirina dirûşmeyan bi dawî bû.
