Siyasetmedarên ku beşdarî civîna eşkerekirina deklarasyona Newroza 2026an bûn diyar kirin ku ew dixwazin Newroza îsal bibe Newroza azadiyê û yekîtiya demokratîk a gelê Kurd. Beşdaran bang li gel kir ku îsal jî wek her sal bi ruhê Kawayê Hesinkar li qadan agirê Newrozê geş bikin. Hevserokê Giştî yê DEM Partiyê Tuncer Bakirhan got ku ew dixwazin agirê Newroza îsal bibe meşaleya aştiyê û azadiyê.
Koordînasyona Navendî ya Newrozê li Sumeperparkê ya Amedê bi civînek çapemeniyê deklarasyona Newrozê eşkere kir. Hevserokên Giştî yên Partiya Heremên Demokratîk (DBP) Çîgdem Kiliçgun Ûçar û Keskîn Bayindir, Hevserokê Giştî yê DEM Partiyê Tuncer Bakirhan, Hevberdevkê Înîsiyatîfa Yekîtiya Demokratîk Mehmet Kamaç, aktivîstên TJAyê, endamên Meclîsa Ciwanan a DEM Partiyê, nûner û rêveberên partiyên siyasî û rêxistinên sivîl û gelek welatî beşdarî civîna deklarasyonê bûn.
Beşdar bi bi cil û bergên xwe yên Kurdî beşdarî civînê bûn. Li ser dikê pankarta “Newroza Azadî û Yekîtiya Demokratîk” hate daliqandin. Beriya ku deklerasyon bê eşkerekirin strana Komîna Hûnermendên Wanê bi navê “Newroza Serfiraziyê” hatibû amadekirin hate temaşekirin. Metna Deklarasyonê ya bi Kurmancî ji aliyê aktivîsta TJAyê Fatma Ablay ve hate xwendin. Piştre beşdar axivîn.
Ewilî Hevseroka
‘Newroza 2026an bila bibe Newroza azadiyê û Newroza serkeftinê’
Hevberdevkê Yekîtiya Demokratîk Mehmet Kamaç da zanîn ku çawa Kawayê Hesinkar li dijî zor û zordariyê li ber xwe daye gelê Kurd jî îro bi wê mebestê li ber xwe dide û got: “Belê em careke din di demek dîrokî de pêşwaziya Newrozê dikin. Çima em dibêjin rojeke dîrokî? Heta niha bi rastî me digot, em di demên dîrokî re derbas dibin. Lê belê em vê dawiyê dibêjin, em di rojeke dîrokî re derbas dibin. Wekî Kawayê Hesinkar, bi hezaran sal beriya niha, li hemberî zilm û zordariyê serhildaneke/berxwedaneke bêhempa da û serkeftin û azadî pêk anî. Em dibêjin gelê Kurd bi sedan salan e li hemberî zilm û zordariyê bi rastî jî berdêlên gelekî giran dane. Bi rastî jî têkoşîneke bêhempa didin. Bi rastî jî rastî êrîşên qirkirin û tunekirinê hatine. Em dibêjin Newroza 2026’an, wekî ku hatiye pênasekirin, bila bibe Newroza azadî û yekîtiya demokratîk. Em dibêjin Newroza 2026’an ji bo gelê Kurd bila bibe Newroza azadiyê û Newroza serkeftinê. Bi vê mebestê, em bi vê Newrozê pêşwaziyê dikin.”
‘Mebesta wan a destkeftiyên Kurdan bûn’
Mehmet Kamaç destnîşan kir ku Rojhilata Navîn di rojên dîrokî re derbas dibe û ev tişt anî ziman: “Geşedanên ku rû didin, di heman demê de sedemeke wan jî ew e ku careke din êrîşên qirkirinê li ser Kurdan hene. Me di peyamên xwe yên Newrozê de dît; gelo çi pîlan li ser Kurdan hatin kirin, xwestin Rêveberiya Xweser a li Rojavayê Kurdistanê bi çi rengî têk bibin. Mebesta wan a serekî hemû destkeftiyên Kurdan bûn, pêşeroja Kurdan bû. Lê gelê Kurd, miletê Kurd li çar perçeyên Kurdistanê û dîasporayê, li kîjan dera dinyayê Kurdek hebe, bi rûhê yekîtiyê rabû pêyan. Em careke din li ser navê Însiyatîfa Yekîtiya Demokratîk we hemûyan bi hurmet û rêzdarî silav dikin û spasiya beşdarbûna we dikin. Bi hêviya rojên azad û bextewar, bimînin di xêr û xweşiyê de.”
Hevseroka Giştî ya DBPê Çîgdem Kiliçgun Uçar jî axivî û bal kişand ser girîngî û wateya Newrozê.
‘Birêz Abdullah Ocalan ev meşale pêxist’
Hevserokê DEM Partiyê Tuncer Bakirhan jî destnîşan kir ku ew di serî de Rehşan û Mazluman bibîr tînin û ew bûne ronahiya gelê Kurd û wiha axivî: “Gelê me di demên dîrokî de derbas dibin, îro li Rojhilata Navîn de gelek tişt diqewimin. Belê, em dibêjin tu xêr hatî Newroz. Tu xêr hatî Newroza agirî. Em dildarê Newrozê ne. Newroz, jibo gelê Kurd berxwedan e, azadî ye. Têkoşîna jiyanê ye. Felsefeya jiyan, jiyan azadiyê ye. Gelê me yê hêja. Cîhan di nav şer de ye. Em dema dinêrin derdora xwe, gerek Kurd bibin yek. Eger Kurd yek bin, ne agirê Newrozê vemirîne, ne ji Kurd têk diçin. Îro rojhilata navîn, hesaba nû hene. Her kes ser Kurdan daxive. Bila her kes bizanibe ku Kurd xwedî dîrok e, dîrokek e, xwedî îrade xurt e. Înşallah, wê azadiya xwe, statuya xwe jî bistîne. Bila ev Newroz bibe Newroza azadiya gelê Kurd u yekîtiya demokratîk. Bila ev Newroz bibe bersiva gelê Kurd. Qada Newrozê, yekîtiya gelê Kurd Ji Amedê heta Hewlêrê, ji Kirmanşahê heta Qamişloyê. Em ê bêjin yekîtî, yekîtî, yekîtî. Em dibêjin dem dema yekîtiya netewiya Kurda ye. Newroz ji me ra dibêje yekîtî hêz e. Belê, îro ev peyam ji çar parçeyan derbas dibe. Agirê Newrozê îsal wê bibe meşaleya aştiyê. Beriya sîh salî, birêz Abdullah Ocalan ev meşale pêxist. Em ê ji îro pê ve meşaleyê geş bikin. Em bang li hemû gelê xwe dikin, werin em agirê Newrozê geş biki. Bi yek dengî, em bêjin azadî, aştî û aramî.”
‘Yekîtî ji bo me girîng e’
Rêveberê Partiya Komunist a Kurdistan (KKP) û parlamenterê DEM Partiyê yê Wanê Sînan Çîftyurek jî bal kişand li ser yekîtî û piştevaniya gelê Kurd û wiha axivî: “Silavên germ ji vir dişînim her çar perçeyên Kurdistanê, bi taybetî jî ji bo Rojavayê Kurdistanê. Dil û mêjiyê me li Rojava bû, îro jî dilê me li ser Rojava ye. Her Newroz ji bo gelê Kurd girîng e. Lê îsal hê girîngtir e, çima? Li hundir de peyvên ku jê re çareserî tê gotin hene, li derveyî sînor jî şerekî giran heye ku navenda wî derdora Kurdistanê ye. Em baş dizanin ku gelê Kurd piştgiriyê dide vê pêvajoyê. Şer naxwaze, çek naxwaze, armanca wî ew e ku rojek berê aştiyeke mayînde li vî welatî pêk were. Lê belê, divê em careke din baş bizanibin ku referansa gelê Kurd daye pêvajoyê, bêsînor nîne. Gelê Kurd li bende Enqereyê ye û dibêje ku; Birêz Ocalan gav avêt û got bila PKK çek berde. Li qad û kolanan jî gelê Kurd piştgirî dide pêvajoyê, gelo tu çi dikî? Ji ber vê yekê banga me li Enqereyê ew e ku eger tu dixwazî û armanc dikî ku li Tirkiyeyê, li Anatoliyayê û li Kurdistanê aştiyeke mayînde pêk were û çek werin berdan, wê çaxê divê gav werin avêtin. Em bang li gelê xwe dikin yekîtî girîng e. Îro her sê perçeyên Kurdistanê di hiş û mêjiyê wan de ne. Bangewaziya me ji bo gelê me û partiya me ye; em yekîtiya xwe xurt bikin. Em yekîtiya Rojava û Başûr diparêzin. Dewletên dagirker dixwazin ku şik û gumanan bixin nav perçeyên Kurdistanê, nav Rojava û Başûr. Banga me ji bo gelê me ye, li her çar perçeyên Kurdistanê ye û bi taybetî ji bo gelê Amedê ye em Newroza 2026an bi girsayî pêk bînin.”
‘Newroza 2026an bibe wesîleya aramî, aştî, felat û azadiya gelan’
Rêveberê Partiya Azadî Cemal Satî jî anî zima ku di vê roja dîrokî û pîroz de, bi dilgermî û bi ruhê azadiyê, cejna Newrozê li gelê Kurd pîroz dikin û wiha got: “Ez newroza azadiyê li her çar parçeyên Kurdistanê û li her ferdê ku li her derê cîhanê ye, pîroz dikim. Ez hêvî dikim ku Newroza 2026-an bibe wesîleya aramî, aştî, felat û azadiya gelan. Bê guman, gotin û peyamên me gelek in, Bi vî rengî, ez careke din Newroza tevahiya gelê kurd û ya xelkê Amedê pîroz dikim.”
Li dengê Abdullah Ocalan hate guhdarîkirin
Herî dawî li dengê Rêberê Gelê Kurd Abdullah Ocalan ku di Newrozek berê de axivîbû bi tevî wêneyê wî ve hate guhdarîkirin û temaşkirin û piştî bi dawî bû girse li ser pêyan dirûşma “Bijî Serok Apo” berz kir.
Paşê bername bi dawî bû.
