Ciwanên di çarçoveya seferberiya neteweyî de derbasî Rojavayê Kurdistanê bûn bang li tevahiya ciwanên Kurdistanê kir ku derbasî Rojava bibin û cihê xwe di nav berxwedanê de bigirin.
Ciwanên ji başûrê Kurdistanê yên tev li seferberiyê bûn, daxuyaniyek dan. Di daxuyaniyê de wiha hate gotin: “Weke gelê Başûr em di navbera Başûr, Bakur, Rojava û Rojhilat de tu cudahiyê nabînin, hemû yek e. Weke ciwan sedema hatina me ya li vê derê ew e ku piştgiriyê bidin hevalên xwe û gelê xwe. Îro şerê man û nemanê tê meşandin. Êrişên HTŞ û DAIŞ’ê yên li ser Rojava dewam dikin. Em hêvî dikin ku ev şer tavilê bi dawî bibe.”
Ciwanên ji Rojhilat: Roja têkoşîna man û nemanê ye
Yek ji ciwanan anî ziman ku ew ji rojhilatê Kurdistanê ye, ji bo parastina xwişk û birayên xwe yên li Rojava li vê derê ye û got: “Îro têkoşîneke man û nemanê tê meşandin. Di navbera Rojhilat û Rojava de cudahî nîne. Hemû heman xak e. Dijminê me xaka me parçe kiriye.
‘Bihostek axa me ji dijmin re namîne’
Rêya rawestandina komkujiyên DAIŞê berxwedana hevpar e. Ji ber vê yekê divê em hemû li ber xwe bidin. Divê bihosteke bi tenê ya xaka me ji dijmin re neyê hiştin. Em hatin ku canê xwe feda bikin. Em hêvî dikin ku gelê Kurdistanê piştgiriyê bide vê berxwedanê. Bila kes li mala xwe rûnenê; her kes alîkariya ji dest tê, bike.”
Daxuyanî bi dirûşma “Bijî Kurdistan”, “Bijî serkeftin” û “Bijî berxwedana Rojava” bi dawî bû.
