Wan – Welatiyên Ebexê diyar kirin ku Newroz ji bo gelê Kurd sembola hebûn, azadî û serhildanê ye û gotin: “Bila Newroza îsal bibe mizgîniya azadiya girtiyên siyasî û wesîleya avakirina aştiyeke mayînde.”
Newroz li Bakurê Kurdistanê beriya her tiştî mizgîniya vejîna xwezayê û cejna hembêzkirina axê ye. Ew mîna cejneke rengîn a çandî ye ku bi hezaran salan e di nava civakê de koka xwe berdaye û bi hatina biharê re ruhê mirovan nû dike. Newroz li Bakurê Kurdistanê wekî “Cejna Serhildanê” jî tê pênasekirin. Govendên ku li dora agir tên gerandin, nîşaneya yekîtî û ruhê kolektîf ê gel e. Newroz îsal bi dirûşma “Newroza Azadî û Yekîtiya Demokratîk” li Bakurê Kurdistan û Tirkiyeyê tê pîrozkirin. Yek ji navênda ku agirê Newrozê lê hat pêxistin jî navçeya Ebexê ya Wanê bû. Welatiyên ku tev li pîrozbahiya Newrozê bûn, axivîn.
‘Bila Newroz bibe sedema aştiyeke mayînde’
Weltiyê bi navê Ahmet Sayinel bal kişand ser girîngiya Newrozê û diyar kir ku newroz ji bo gelê Kurd hebûn û tunebûn e û wiha got: “Bi salan e Newroz hat qedexekirin, lê belê di vê demê de em Newroza xwe bi kêfxweşî pîroz dikin. Niha em Newrozê bi awayekî azad pîroz dikin, sedema vê azadiyê jî Rêberê Gelê Kurd Abdullah Ocalan e. Bila Newroz bibe sedema azadiya girtiyên di zindanan de û bibe wesîleya aştiyeke mayînde.”
‘Em ziman û mafên xwe dixwazin’
Nesîm Yildizer jî da zanîn ku Newroz ji bo wî tê wateya serhildan, aştî û baweriya gelê Kurd û got: “Baweriya me bi Newrozê heye û em bi Newrozê hene. Hevalên me di zindanan de ji bo Newrozê bedena xwe dan ber agir, bûn sembola Kurdan. Heke Newroz tune be, em jî tunene. Newroz qedera gelê Kurd e. Bila Newroza 2026an bibe sedema aştiyê û daxwazên me bên cîh. Em ziman û mafên xwe dixwazin; em ê bi berxwedana xwe serbikevin.”
‘Bila agirê Newrozê rêya aştiyeke mayînde ronî bike’
Welatiyê bi navê Ozcan Topkaç jî anî ziman kû Newroz xelasiya gelê Kurd e û cejneke pir girîng e û wiha got: “Newroz sembola herî mezin a azadiyê ye. Hêvîdar im ku Newroza îsal bibe mizgîniya aştî, biratî û azadiyê; bibe wesîleya azadkirina hemû girtiyên siyasî û Rêberê Gelê Kurd Abdullah Ocalan. Bila agirê Newrozê rêya aştiyeke mayînde ronî bike.”
