Bi hezaran welatî beşdarî mitînga “Aştî û Azadiyê” ya li Amedê bûn. Di mitîngê de azadiya Rêberê PKKê Abdullah Ocalan hat xwestin û carek din ji bo aştî û azadiyê bang hat kirin ku desthilat gavên şênber biavêje.
Rêxistinên DEM Partî û Partiya Herêmên Demorkatîk (DBP) ên Amedê bi dirûşma “Ji bo aştî û azadiyê” li Qada Îstasyonê ya Amedê bi beşdariya hezaran kes mitîng li dar xist. Welatî bi xeml û rengên xwe tev li mitîngê bûn. Ji bilî xelkê Amedê gelek welatî ji bajar û navçeyên bakurê Kurdistanê jî hatin tev li mitîngê bûn.
Di mitîngê de li ber stranan govend hat gerandin û girseyê bênavber dirûşmên dilsoziya bi Abdullah Ocalan re qîriyan.
Qada Îstasyonê carek din banga azadiya Ocalan kir
Li qada mitîngê ku berê vê qadê ji milyonan kes re mazûvaniyê kiribû, îro carek din daxwaz û banga çareseriya demorkatîk a pirsgirêka Kurd hat kirin. Bi hezaran carek din mîsogeriya azadiya Abdullah Ocalan xwestin û xwestin êdî Ocalan dikaribe di nav şert û mercên azad de tevbigere û aştî û azadî mîsogerkirin. Bi hezaran welatî êrişên li ser Rojavayê Kurdistanê jî şermezar kirin û daxwaza statuya Rojava û azadiya gelan kirin.
Mitîng bi konserê bi dawî bû
Piştî axaftina siyasetmedaran Kolektîfa Rîtmên Azad Navenda Çanda Biharê ya Êlihê derket ser dikê û stran gotin. Welatî li ber stranên komê govend gerandin. Dîmenên rengîn derketin holê.
Dayikên Aştiyê jî ketin milê hev û bi gerandina govendê coş û xemla govendê geş kirin. Li aliyekî dirûşmên azadiyê hatin berzkirin li aliyekî welatî bi coş û peroş govend gerandin.
Endamên Meclisa Ciwanan a DEM Partiyê pankarta “Silav ji zarokên rojê re” rakirin û li qada mitîngê gerandin.
