Piştgiriya ji bo Rojava û taybetî bo Kobanê didome. 16 baroyan Bakurê Kurdistanê ji bo karesata li Kobanê xwestin ku deriyê Murşîtpinarê demildest ji alîkariya mirovîn re bê vekirin.
Li aliyekî êrişên qirkirinê li dijî Rojava û bi taybetî li dijî Kobanê didomin li aliyê din jî piştgirî û alîkariya neteweyî ya ji bo berxwedana gelê Rojava berdewam dike. 16 baroyên li Bakurê Kurdistanê; baroyên bajarê Semsûr, Agirî, Êlih, Çewlîg, Bedlîs, Dersim, Amed, Îdir, Colemêrg, Qers, Mêrdîn, Mûş, Sêrt, Riha, Şirnex û Wan derbarê dorpêçkirin û êrişên li ser Rojava de daxuyaniyek hevpar ya nivîskî belav kirin. Di daxuyaniyê de hate destnîşankirin ku pevçûn û krîza mirovî li Kobanê bi taybetî ji bo jin, zarok, kal û pîr, welatiyên nexweş gihîştiye asteke krîtîk.
‘Li Kobanê mafê jiyanê di bin gefê de ye’
Baroyan da zanîn ku gihîştina pêdiviyên bingehîn ên xwarinê, tenduristiyê û stargehê ji ber dorpêçê hatiye astengkirin û mafê jiyanê li Kobanê di bin gefeke mezin de ye. Baroyan diyar kir ku girtina deriyê sînor ê Murşitpinarê û astengkirina derbasbûna alîkariya mirovî ji bo Kobanê binpêkirina hiqûqa navneteweyî û mafên mirovan e.
‘Dewleta neçarin ku jiyana mirovan biparêzin’
Baroyan anî ziman ku nabe alîkariya mirovî ji ber sedemên siyasî an ewlehiyê bên astengkirin û dewlet mecbûr in gel biparêze û gihandina alîkariyê mîsoger bikin.
‘Divê derî bê vekirin û alîkarî neyê astengkirin’
Baroyan daxwaz kir ku demildest deriyê sînor ê Mûrşîtpinar bê vekirin û ji bo pêşî li keraseta mirovî ya mezin bê girtin û divê alîkarî bê astengî derbas bibe. Baroyan ev yek anî ziman: “Serlêdanên me yên nivîskî dê ji hemû rayedarên têkildar re bên şandin û em bi rêzdarî ji raya giştî re radigihînin ku em ê pêvajoyê hem di aliyên qanûnî û hem jî di aliyên mirovî de bişopînin.”
