Amerîka û hêzên wekîl yên rejîma Îranê yên girêdayî Heşdî Şabî duh bişev bi moşek û dironan êrişî çend cihên hesas û krîtîk yên Paytexta Iraq Bexdayê kirin.
Li gorî nûçeya Rojnewsê duh bi şev li Bexdayê şevek ne aram bû. Hat diyarkirin ku bi diron û moşekan êrişî çend cihên hesas û giring hat kirin. Di agahiyê de hat aşkerakirin ku êriş ji aliyê Amerîka û komên çekdar ve pêk hatin û di encama van êrişan çend teqînên mezin jî pêkhatin.
Agahiya destpêkê ji bo êrişa bi ser sefaretxaneya Amerîkayê re hat dayîn. Di agahiyê de hat gotin ku li dijî Sefaretxaneya Amerîkayê ya li Baxdayê êrişa bi diron û moşekan pêk hat û di encama êrişê de şewat derket û dukêla şewatê di ser Bexdayê de wek şemsiye veda.
Heşdî Şabî bi 3 moşek û 4 dironan li Sefareta Amerîkayê xist
Li gor agahiya ajansê piştî êrişê sîstema parastina asîmanî ya sefaretxaneya Amerîka bersiva êrişên bi diron û mûşekan daye. Li gor heman agahiyê bi 4 diron û 3 moşekan êrişa bi ser sefaretxaneya Amerîkayê re pêk hatiye. Her wiha hêzên ewlehiyê derdora devera Kesk dorpêç kirin û hêzên dije terora Iraqê li derdora devera Kesk belav bûn.
Piştre li taxa Cadirye ya li nava Bexdayê ye, avahiyek bi moşekek hat teqandin. Li gor agahiyên ji çavkaniyên hêzên ewlehiyê yên Bexraşê hatine girtin ew xanî yê payebilindekî hêzên Heşdî Şabî bû.
Serokê Tevgera Seyîd Şuheda hat kuştin
Li gor çavkaniyên nêzî Heşdî Şabî, di wî xanî de 6 kes hatine kuştin û çend kesek jî birîndar bûne. Heta hin çavkanî dibêjin ku ev xanî yê Serokê Tevgera Seyid Şuheda, Ebo Ela Welayî bû. Lê heta niha ev agahî nehatiye piştrastkirin.
Beriya van bûyeran hikûmeta Iraqê bi daxuyaniyekê êrişên bi dironan yên li ser balafirgeha Bexda û derdora wê şermezar kiribû.
Berî çend rojan jî li nava Bexdayê xaniyek du caran hatibû bombebarankirin. Li gor çavkaniyên ewlehiyê, êriş ji a liyê Amerîkayê ve pêkhatiye û di encama êrişê de çend çekdarên hêzên Heşdî Şabî hatin kuştin.
Ji dema despêkirina şerê Amerîka-Îsraîl û Îranê ve bi dehan car baregeh û navendên Heşdî Şabî hatine bombebarankirin. Di encamê de bi dehan kes hatine kuştin û birîndarkirin. Êriş heta niha jî didomin.
