Bi sedan kes li Cizîr û Silopya çûn serdana şîna endamên HPGê Ûgûr Daniş û Vedat Acar.
Ji bo endamên HPGê Ûxûr Daniş (Demhat Feraşîn) û Vedat Acar (Cesûr Spîndarok) ên 17ê Kanûna 2018an li Garê jiyana xwe ji dest dabûn, li navçeyên Cizîr û Silopya yên Şirnexê şîn danîn. Di pêşengtiya MEBYA-DERa Şirnexê de Parlementerê DEM Partiyê yê Şirnex Mehmet Zekî Îrmez, endam û rêveberên partiyên siyasî, saziyên civaka sivîl û gelek welatiyan çûn şînê. Girseya ku li ber avahiya DEM Partiyê ya Cizîr kom bûn heya cihê şînê ya li taxa Çemkûrkê ya Cizîrê meşiya. Di meşê de diruşma, ‘Şehîd namirin’ û ‘Ey şehîd xwîna te li erdê namîne’ berz kirin. Di meşê de polîsan xwest girseyê asteng bike lê girseyê benda polîsan şikand û bi diruşma meşiya heya cihê şînê. Li vir ji bo cangoriyên azadiyê rêz girtin.
Piştre Parlementer Zekî Îrmez diyar kir ku gelê Kurd di sed salên dawî de rastî tunehesibandinekî hat. Îrmez bi lêv kir ku bi berxwedana PKKê gelê Kurd hatiye astek nû û axaftina xwe wiha berdewam kir; “Îro em bi saya van cangoriyan gehiştine astekî. Di vê sedsalê gelê Kurd berxwedanek mezin da. Heta ev berxwedan negêje serkeftinê em ê têkoşîna xwe berdewam bikin. Teqez em ê serbikevin. Em ê vê pêvajoyê bigehînin serkeftinê.”
Serdana şîna Daniş bi xwendina duayan bi dawî bû.
Li Sîlopiyê jî şîn danîn
Girseya ku li ber Parqa Ahmet Kaya ya taxa Yenîşehîrê ya navçeya Silopya kom bûn jî , heya cihê şînê ya ji bo Acar hatiye danîn, bi diruşma, ‘Şehîd namirin’ û ‘Ey şehîd xwîna te li erdê namîne’ meşiya.
Piştî girse gehişt mala şînê ji bo cangoriyên azadiyê deqeyek rêzgirtin pêk anî. Piştî rêzgirtinê Bavê Acar, Suleyman Acar axivî û got kurê wî şehîdê hemû Kurdistanê ye û serê hemû gelê Kurd saxbe.
Piştî bav Acar, Hevserokê DEM Partiyê yê Şirnex Ramazan Ûysal got ku ew bi şehadeta cangoriyên azadiyê serbilind in û wiha axivî; “Bi berxwedana hevalên weke Cesûr em serbilind in. Ji bo ku daxwaza wan pêk were divê gelê Kurd bibe tifaq. Weke hûn jî dizanin Rêberê Gelê Kurd Birêz Ocalan 27ê sibatê banga aştiyê û civaka demokratîk pêk anî. Ji bo ku ev pêvajo bi ser bikeve û xeyala cangoriyan pêk were divê em ji her alî ve xwe rêxistin bikin û tifaqa xwe pêk bînin.”
Piştî axaftina Ûysal serdana şîna Acar bi xwendina duayan bi dawî bû.
