Rêveberên MEBYA-DERê, DEM Partî, DBP û rêxistinên demokratîk û aktîvîstên TJAyê bi girseyî çûn şîna şervana YPJê Derya Çaglar.
Şervana Yekîneyên Parastina Jinan (YPJ) Derya Çaglar (Arjîn Botan), di 22yê Çileya 2024an li bajarê Tebqayê yê Bakûr û Rojhilatê Sûriyeyê jiyana xwe ji dest dabû. Malbatê ji bo keça xwe şîn danîn. Endam û rêveberên MEBYA-DERê, endam û rêveberên partiyên siyasî, saziyên civaka demokratîk û gelek welatî bi girseyî çûn şînê û sersaxî ji malbatê re xwestin. Girseya ku li ber Avahiya DEM Partiyê ya Hezexê kom bûn, heta taxê diruşma, ‘Şehîd namirin’ berz kirin. Girse heta Taxa Atakent meşiya û dirûşm berz kirin.
Piştî girse gihişt cihê şînê ji bo cangoriyon azadiyê rêz girtin û piştre Hevseroka MEBYA-DERê ya Şirnexê Emîne Erkûş sersaxî ji malbatê re xwest û got dê her tim şopdarên şehîdan bin.
Hevseroka DEM Partiyê ya Hezexê Songul Erden jî diyar kir ku ew ê li ser şopa cangoriyên azadiyê bimeşin. Parlamenterê DEM Partiyê yê Şirnexê Mehmet Zekî Îrmez jî sersaxî ji malbata Derya Çaglar û hemû gelê Kurd re xwest û wiha axivî: “Têkoşîna me bi saya cangoriyên me hatiye qonaxek girîng. Pêvajoya îro em têde bi tekoşîna cangoriyên me pêk hatiye. Em ê li gel hemû astengiyan li ber xwe bidin û têkoşîna wan ber bi serkeftinê ve bibin. Ji bo serkeftina vê pêvajoyê divê em pêtir xwe rêxistin bikin. Em careke din dibêjin serê malbat û rêhevalên heval Arjîn saxbe.”
Dayîka Derya Çaglar, Talîa Çaglar ku wêneyê keça xwe hildabû jî got ku keça wê şehîda hemû gelê Kurd e, bila serê Rêber Apo û rêhevalên wê saxbin.
Piştî axaftinan serdana şînê bi xwendina duayan bi dawî bû.
