Bijîşkên Sirri Sureyya Onder anîn ziman ku ji aliyê dil ve di rewşa Sirri Sureyya Onder de başbûnek heye û gotin: “Lê ji aliyê norolojîk (Beyîn, mejî) ve diyarbûnek heye. Rewşa nexweşê me di asta xetereya mezin de ye. Lê pêvajoya nexweşê me weka ku em dixwazin berdewam dike.”
Endamê Şandeya Partiya Wekhevî û Demokrasiyê ya Gelan (DEM Partî) ya Îmraliyê Sirri Sureyya Onder ji ber krîza dil 6 roj in li Nexweşxaneya Florence Nightingale ya li navçeya Şîşliya Stenbolê di beşa lênihêrîna awartê de tê tedawîkirin. Nexweşxaneya Florence Nightingale têkildarî rewşa Sirri Sureyya Onder li ber nexweşxaneyê daxuyanî da. Di daxuyaniyê de Rektora Berpirsa Pêvajoyên Tibî ya Nexweşxaneyên Florence Nightingale Prof. Dr Çavlan Çîftçî û bijîşkê Sirri Sureyya Onder Prof. Dr. Ertan Sagbaş derbarê rewşa Onder de agahî dan.
‘Rewşa nexweşê me di asta xetereya mezin de ye’
Prof. Dr Çavlan Çîftçî di destpêke de axivî û anî ziman ku êdî ji aliyê rastê ve jî dilê Sirri Sureyya Onder lê dide û wiha got: “Tansiyona nexweşê me niha baş e. Roja şemiyê me sînga wî vêkir. Enfeksiyon tune bû. Aliyê rastê jî yê dilê wî lê dide lê ne di asta ku em dixwazin de ye. Ji ber vê jî girêdana bi cihazêa dil ve berdewam dike. Fikara bijîşkan a norolojîk berdewam dike û rewş hê ne diyar e. Rewşa bi xetere berdewam dike. Ji aliyê dil ve başbûnek heye. Tedawî wê demekê dirêj bidome. Her roj daxuyanî wê bê dayîn. Cihê ameliyatê vebû û xwîn, enfeksiyon tune ye. Em nikarin demekê diyarker bidin. Hê jî nexweşê me nehatiye ser hiş û hemdê xwe. Ji ber ku hişçûyîn gumana norolojîk (mêjî) hene. Fikarên me cidî ne. Ji ber wê nexweşê me di asta xetereya mezin de ye.”
‘Ji aliyê dil ve ber bi başbûne ve diçe’
Bijîşkê Sirri Sureyya Onder Prof. Dr. Ertan Sagbaş jî diyar kir ku lêdana aliyê dil ê rastê agahiyeke baş e lê hê jî ew ê li bendê bimînin û testê wan wê berdewam bikin û got: “Rewşa organên hundir, kezeb û gurcik baş in. Pêvajo weke ku em dixwazin berdewam dike. Ev jî nîşan dide ku em di rêyeke baş de ne. Ji aliyê dil ve ber bi başbûne vê diçe. Lê rewşa norolojik hê jî ne diyar e. Em nikarin tiştekî şênber bêjin. Em dixwazin li mêjî jî binirin lê kengî ev pêk were, ne diyar e. ”
