Rêxistina DEM Partî û DBPê ya navçeya Farqîna Amedê li dijî êrişên Rojavayê çalakî li dar xistin. Hevserokê DEM Partiya Farqînê di çalakiyê de bal kişand ser êrişên Rojavayê û got: “Îro em taştê bin sibê jî hûn firavîn in.”
Rêxistina DEM Partî DBPa Farqînê, TJA, Şaxa MED-DERê ya navçeyê, Hevşaredarên navçeyê, nûnerên saziyên sivîl û gelek welatî li dijî êrişên ser Rojava yên HTŞ, SMO û Tirkiyeyê, li parka Rindêxanê çalakî li dar xistin.
Girseya ku li parke kom bûye ji aliyê polîsan ve hat dorpêçkirin. Bi ser vê yekê girse dest bi çalakiya rûniştinê kir. Girse di çalakiya rûnişinê de dirûşmên “Bijî Serok Apo”, “Rojava rûmeta me ye”, “Rojava Rojhilat e Kurdistan yek welat e”, “QSD gel e gel li vir e”, “Bijî berxwedana Rojava”, “Bijî berxwedana QSDê” û “Ciwan fedaiyên Rêber Apo ne” berz kir.
‘Em li cem Rêbertî, Rojava û Rojhilat in’
Hevserokê rêxistina DEM Partiyê ya Farqînê Mahfûz Kizilduş destnîşan kir ku polîtîkayên tên meşandin dişibûn bûkalemûnê û wiha got: “Ev feraset dûrî mirovahiyê ye. Di sala 1999an de Rêberê Gelê Kurd Abdûllah Ocalan, bi havkariya 47 dewletan di encama komployekê de hatibû girtin. Ev rewşa heyî jî berdewama wê komployê ye. Bila her kes baş zanibe ku gelê Kurd hişyar e. Kesên ku komployan didin meşandin, bila baş zanibin ku Rêberekî vî gelî heye.”
‘Em taştê bin hûn firavîn in’
Di daxuyaniyê de Mahfûz Kizilduş dîroka têkoşînê ya Kurdan bi bîr xist û wiha got: “Ev der Rojava ye, Başûr e, Rojhilat e. Divê li ser vê esasê bifikire û li xwe mikûr bê. Daxwaza me yekbûn e. Divê Rêbertî esas bê girtin. Ger ku esas neyê girtin îro em taştê bin, sibê jî hûn firavîn in. Em li cem Rêbertiya xwe, li cem Rojava û Rojhilat in. Em Kurd in. Em bang li we dikin ku hûn jî werin û beşdarî mirovatiyê bibin.”
Çalakî bi dirûşm û çepikan bi dawî bû.
