Şirnex – Endamê Meclisa DBPê Hîkmet Doman çavdêriyên xwe yên li ser civînên gel ên di çarçoveya banga Aştî û Civaka Demokratîk de parve kir û got: “Gel herî zêde li dijî dewletê bi fikar e û di serî de dixwaze dewlet gavên çareseriyê bavêje.”
Rêberê Gelê Kurd Abdullah Ocalan di 27ê Sibatê de bi rêya şandeya Partiya Wekhevî û Demokrasiyê ya Gelan (DEM Partî) ya Îmraliyê banga Aştî û Civaka Demokratîk kir. Banga Abdullah Ocalan li her çar aliyên Kurdistanê li qadan hat guhdarkirin. Dîsa li hemû cihanê jî deng veda. Banga dîrokî ya Abdullah Ocalan rojeva sereke ye. Piştî banga Abdullah Ocalan Partiya Wekhevî û Demokrasiyê ya Gelan (DEM Partî) bernameya li 100 navendan civînên gel amade kir. Civînên gel didomin. Nûnerên saziyan tev li civînên gel ên banga “Aştî û Civaka Demokratîk” dibin û pirsên gel bersivandin û wateya bangê ji gel re vêgotin. Li Şirnexê jî li navçeya Cizîr, Silopiya û navenda Şirnexê civînên gel pêk hatin. Gelek kes beşdarî civînan bûn û nirxandin kirin. Endamê Meclîsê ya Partiya Herêmên Demokratîk (DBP) Hîkmet Doman û welatiyê bi navê Abdullah Bakiş ên tevlî civînê bûn ji Ajansa Welat (AW) re axivîn.
‘Divê dewlet jî gavan bavêje’
Ji welatiyê tevlî civînê bû Abdullah Bakiş anî ziman ku ew bi Abdullah Ocalan bawer e û xwest dewlet jî li gor bangê gavan bavêje. Abdullah Bakiş tekildarî banga Aştî û Civaka Demokratîk a Rêberê Gelê Kurd Abdullah Ocalan ev tişt got: “Em banga Aştî û Civaka Demokratîk silav dikin. Em bawerin serkeftin wê çêbibe. Divê em hemû li vê bangê xwedî derbikevin. Ew bang ji bo hemû gelan aramî, aştî û azadiyê tîne. Ji bo ew pêvajo bi pêş ve biçe divê em hemû bi berpirsyar tev bigerin. Fikara me ji bo banga birêz Abdullah Ocalan tune ye. Em bi birêz Abdullah Ocalan bawerin. Tenê em ji dewletê bi fikar in. Divê dewlet jî li gor vê bangê gav baveje. Ji bilî gav avetinê tu tiştekî ku dewlet bike tune ye. Bi her awayî ketine qeyraneke. Ji bo wê jî dewlet jî hewcedariya aştiyeyê û divê ew jî ji bo aştî pêk were gav baveje.”
‘Gel ji dewletê bi fikar e’
Endamê Meclîsê ya Partiya Herêmên Demokratîk (DBP) Hîkmet Doman jî diyar kir ku ew bi civînan dixwazin gel ji pêvajoyê agahdar bikin û wiha got: “Li ser banga Aştî û Civaka Demokratîk a Rêberê Gelê Kurd birêz Abdullah Ocalan me li Şirnexê civînên gel li darxistin. Armanca me ew e ku derbarê banga Civaka Demokratîk û Aştiyê de gelê xwe agahdar bikin. Girîngiya bangê çi ye û divê gel çawa tevlî vê pêvajoyê bibe em civînan li dar dixînin. Birêz Abdullah Ocalan hertim qala aştî û civaka demokratîk dike. Em jî bi van civînan pirsên gel dipersivînin û wateya bangê vedibêjin.”
Di berdewama axaftina xwe de Hîkmet Doman destnîşan kir ku di civînan de encama derketiye holê herî zêde fikarên gel ji bo dewletê hene û wiha dirêjî da axaftina xwe: “Di civînan de jî derket holê ku fikarên gel hene. Fikarên gel ji bo banga Rêberê Gelê Kurd Abdullah Ocalan tune ye. Fikarên gel ji bo helwesta dewletê heye. Gel bi fikare ku dewlet dê gavan baveje an neaveje. Li ser vê yekê fikarên gel hene. Em jî dibêjin baweriya me bi Rêberê Gelê Kurd heye. Banga Rêberê Gelê Kurd birêz Abdullah Ocalan pêşya komkujiyên di Rojhilata Navîn de diqewimin digirê. Banga Civaka Demokratîk tê wateya welatekî hevpar, wekhevî û azadiya gelan. Em hevî dikin ew bangavazî li her çar aliyên Kurdistanê û tevahî Rojhilata Navîn ber bi pêvajoyeke baş ve bibe. Heviya gel jî ew e. Lê tenê fikarên wan ji bo dewletê hene. Piştî van civînan jî em ê mal bi mal hevdîtinên xwe yên gel berdewam bikin.”
