Şirnex – Hevseroka DBPê ya Cizîrê Aynur Elçîoglu diyar kir ku di civînên gel de herî zêde gel li ser gav neavêtina dewletê fikarên xwe tînê ziman û welatiyên tev li civînan dibin, jî destnîşan dikin ku divê dewlet girtiyên siyasî serbest berde.
Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) têkildarî banga “Aştî û Civaka Demokratîk” a Rêberê Gelê Kurd Abdullah Ocalan li bajarên Bakurê Kurdistan û Tirkiyeyê dest bi civînên “Aştî û Civaka Demokratîk” kirin e. Hatiye plankirin ku 2 hezar civînen gel bêne lidarxistin. Civînên gel li hemû bajar û navçeyên bakurê Kurdistanê didomin. Di civînên ku bi gel re tên li darxistin de nivîsên li ser pêvajoyê ya bi nêrînên Abdullah Ocalan û avakirina Civaka Demokratîk tê xwendin û li ser pêvajoyê nirxandin tên kirin. Welatiyên beşdarî civînan dibin jî li ser pêvajoyê fikarên xwe û pirsên xwe tînin ziman. Yek jî armanca civînan ew e ku pêvajoya hatiyê destpêkirin bi awayekî zelal bi gel re bê parvekirin.
Yek ji bajarên civînên gel tên lidarxistin Şirnex e. Li navçeya Cizîr, Silopiya, Qileban, Elkê, Basa û bajarokên Şirnexê û navenda Şirnexê li tax û gundan bi gel re civîn têne lidarxistin. Welatiyên li Şirnexê û navçeyên wê jî eleqeyeke mezin nîşanî civînan didin. Bi girseyî beşdar dibin. Tax bi tax, gund bi gund, navçe û navçe civînên gel têne lidarxistin.
‘Em gel derbarê pêvajoyê de agahdar dikin’
Hevseroka DBPê ya navçeya Cizîrê Aynur Elçîoglu a ku beşdarî cîvînên gel dibe anî ziman ku armanca wan a civînê derbarê pêvajoyê de agaharkirina gel e û got: “Em derbarê banga birêz Abdullah Ocalan a ‘Aştî û Civaka Demokratîk’ de bi awayekî şênber gel agahdar dikin. Armanca me ya civînê pêvajo bi gel re bi awaykî zelal bê gotin û tevlikirina gel a pêvajoyê ye. Em dixwazin bi gelê xwe re yekîtiya xwe xurt bikin û di vê pêvajoyê de destê birêz Abdullah Ocalan jî xurt bikin.”
‘Gel ji ber gavneavêtina dewletê bi fikar e’
Aynur Elçîoglu destnîşan kir ku di civînan de herî zêde gel li ser gav neavêtina dewletê fikarên xwe tîne ziman û ev yek anîn ziman: “Welatî pir zêde pêvajoyê meraq dikin û dixwazin hîn bibin. Gel li pişt Serokê xwe ye. Lê fikarên wan li ser dewletê hene. Gel dibêje em gav diavêjin lê me gavên dewletê nedîtiye. Gel ji ber vê yekê pirr bi fikar e. Gelê me aştiyê dixwaze. Lê ji bo aştiyê dixwazin dewlet jî gavan biavêje. Ji bo baweriya gel jî pêvajoyê çêbibe divê dewlet jî gavan biavêje. Di destpêke de divê şer bisekine. Girtiyên siyasî bên berdan. Weke gel em jî dixwazin bi ziman û nasnameya xwe bi awayekî wekhev bijîn. Gelê me jî vê dixwaze. Ji bo wê divê dewlet jî gavan biavêje. Em bang li gelê xwe dikin ku gelê me jî were tevli van civînan bibin û heke pirsnîşanê wan hebin di van civînan de bînin ziman.”
‘Divê dewlet jî gavan biavêje’
Ji welatiyê bi navê Alî Coşkun ku tev li civînên gel ên Cizîrê bû jî anî ziman ku tenê daxwaza wan aştî ye û wiha got: “Em dixwazin ev şer bisekine û pêvajoya çareseriyê bi ser bikeve. Em jî weke hemû netewên dinyayê dixwazin wekhev û azad bijîn tenê daxwaza me ev e. Ji bo hînkirina pêvajoyê jî em hatin tev li civînê bûn. Em piştgirî didin vê pêvajoyê û dixwazin ev pêvajo bi ser bikeve.”
Ji welatiyan Feqih Aslan ku tev li civînê bû jî bi lêv kir ku ji bo piştgiriya pêvajoyê bikin û derbarê pêvajoyê de agahiyan hîn bibin tev li civîna gel bûye û got: “Daxwaza me hemûyan aştî ye. Em dibêjin bila êdî şer rawest e. Em dixwazin her kes bikaribin serbest biçin gundên xwe û azad bijîn. Divê dewlet jî gavan biavêje. Divê girtiyên siyasî bên berdan.”
