Amed – Malbatên endamên Meclisa Ciwanan a DEM Partiyê Yûsûf Demîrpolat û Suleyman Kahraman ku li Amedê hatibûn girtin li girtîgehê serdana zarokên xwe kir û diyar kir ku zarokên wan xistine hucreyan û bicihkirina qawişên bêalî li wan ferz dikin.
Platforma Ciwanên Welatparêz ji bo azadiya Rêberê Gelê Kurd Abdullah Ocalan, bi dirûşmeya “Bi Rêberê azadiyê re ber bi jiyana azad ve” di 18ê Cotmehê de meşek li dar xistibû. Piştî meşê ciwan ji aliyê nijadperestên Tirk, rayedarên desthilatê û Wezîrê Karên Navxwe Alî Yerlîkaya ve hedef hatibûn nîşandan.
Polîsên ku di 21ê Cotmehê de li gelek bajaran bi ser malan de girtibûn û zarokê bi navê Ferhat Gezer (17), ciwanên bi navê Yûsûf Demîrpolat, Suleyman Kahraman, Halît Konûk, Haşîm Kûtlûk û Ozcan Dal ên endamên Meclîsa Ciwanan a DEM Partiyê ne binçavkiribûn. Ciwanên ku sê rojan di binçavan de hatibûn ragirtin di 24ê Cotmehê de piştî îfadeyên wan ên li dozgerî û dadgeriyê hatibûn girtin û ew şandibûn girtîgehê.
Malbatên ciwanên bi navê Yûsûf Demîrpolat û Suleyman Kahraman dan zanîn ku çûne Girtîgeha Ewlehiya Bilind a bi Hejmara 1an a Amedê ku zarokên wan tê de tên ragirtin û serdana wan kirine. Malbatan diyar kir ku zarokên wan avêtine hucreyan û bicihkirina qawişên bêalî li wan ferz dikin.
‘Nahêlin ew biçin qawişên hevalên xwe’
Dayîka Yûsûf Demîrpolat, Rojda Demîrpolat da zanîn ku di 18ê Mijdarê de çûye serdana kurê xwe û wiha got: “Kurê min got ‘em di hucreya yekkesî de ne û bi awayekî psikolojîk nebaş in. Ji me re dibêjin an hûn ê biçin nava kesên bêalî an jî hûn ê di hucreyê de bimînin.’ Kurê min ew jî vê yekê qebûl nakin. Ji ber vê got heke ev pirsgirêk neyê çareserkirin dê dest bi çalakiya greva birçîbûnê bikin. Nahêlin ew biçin qawişên hevalên xwe yên din û zexta çûyîna nava bêaliyan li wan dikin.”
‘Zexteke psîkolojîk li ser wan heye’
Rojda Demîrpolat anî ziman ku dema ew diçin girtîgehê jî bi pirsgirêkan re rû bi rû dimînin û got: “Em cilan dibin wan bi paş ve dişinin û dibêjin hefteyeke din bînin. Vê hefteyê jî me birin got hefteya pêş bînin. Bi vî awayî jî pirsgirêkan derdixînin. Zexteke psîkolojîk li ser wan heye.”
Banga hestiyariyê li raya giştî kir
Rojda Demîrpolat xwest ku kurê wî hevalên xwe yên di hucreyan de bibin qawişên hevalên wan û destnîşan kir ku ew ê dest ji doza zarokên xwe bernedin. Rojda Demîrpolat da zanîn ku dema zarokên wan dest bi greva birçîbûnê bikin ew ê jî bikevin greva birçîbûnê û banga hestiyariyê li raya giştî kir.
‘Em dixwazin ji hucreya yek kesî bê derxistin’
Dayîka Suleyman Kahraman, Elîf Kahraman jî da zanîn ku ew di 19ê Mijdarê de çûye hevdîtina kurê xwe û wiha got: “Kurê min jî di hucreya yek kesî de ye. Dema me pê re hevdîtin kir, got ku ‘heke zextên wan ên li ser me berdewam bikin, em ê bikevin greva birçîbûnê. Vê yekê ji rayedaran re ragihînin.’ Em dixwazin ji hucreya yekkesî bê derxistin û wî bibin cem hevalên wî. Em naxwazin bikeve nava kesên bêalî.”
