Şirnex – Rojnameger Zekeriya Şêxo ku li Bendava Tişrînê geşedanan ji nêz ve dişopîne anî ziman ku tevî êrişan jî, gel 5 roj in li bendavê nobedê digre û got: “Dema em li vir bi gel re diaxivin dibêjin, “Em ji balafir û bombeyên wan natirsin. Me çawa ku DAIŞ li Kobanê têk bir, em ê dewleta tirk jî li Bendava Tişrînê têk bibin.”
Êrişên komên çekdar ên giredayî Tirkiyeyê li ser herêmên Bakur û Rojhilatê Sûriyeyê berdewam dikin. Bi taybet jî di van rojên dawî de êrişên li ser Bendava Tişrînê zêdetir bûne. Ji aliyekî ve komên çekdar ên giredayî Tirkiyeyê li ser bendavê û ji aliye din vê jî Tirkiye bi SÎHAyan bendavê bombebaran dike. Li dijî êrişên Tirkiyeyê û hêzên çekdar ên giredayî wê hêzên Yekiniyên Parastina Jinan (YPJ), Yekiniyên Parastina Gel (YPG) û Hêzên Suriyeyê Demokratîk (HSD) bersiv dide û pêşî li êrişan digirê. Rêveberiya Xweser a Demokratîk a Bakur û Rojhilatê Suriyeyê jî tekildarî êrişên li ser Bendava Tişrînê daxuyanî dabû û bal kişandibû ser xetereya teqîna Bendavê. Rêveberiya Xweser bi vê daxuyaniyê bang li hêzên navneteweyî kiribû ku pêşî li êrişên li ser bendavê be girtin.
Welatiyên Bakur û Rojhilatê Suriyeyê jî di 8ê çileyê de li dijî êrişên Tirkiyeyê û komên çekdar ên giredayî wê ber bi bendavê meşiyan. Dema welatî ber bi bendavê vê diçûn Tirkiyeyê bi SÎHAyê êrişî karwanê kiribû. Di encamê de 5 welatiyan jiyana xwe ji dest dan û 15 welatî jî birîndar bûn. Welatiyên Bakur û Rojhilatê Suriyeyê tevî êrişan jî 5 roj in li Bendava Tişrînê nobede digirin. Rojnameger Zekeriya Şêxo ku ji roja destpêke ve li Bendava Tişrînê geşedanan ji nêz ve dişopînê ji Ajansa Welat re li ser nobeda ku welatiyan dayê destpêkirin axivî.
‘Berxwedana şervanên YPG, YPJ û HSDê mezin e’
Rojnameger Zekeriya Şêxo bi lêv kir ku ji aliyekî ve komên çekdar ên giredayî Tirkiyeyê ji aliyên vê jî Tirkiye bi SÎHA êrişî herêmên Bakur û Rojhilatê Suriyeyê dike û ev tişt got: “Piştî ketina rejîma Baas û desthilata Sûriyeyê guherî di heman wextê de dewleta Tirk bi destê komên çetê yên weke MSOyê êrişî herêmên Bakur û Rojhilatê Suriyeyê kir. Êrişên Tirkiyeyê li ser herême didomin. Li dijî herêmê û welatiyan êrişên hovanê pêk tînin. Ew êriş bi komên çete yên giredayî wan ve pêk tên. Ew mehek e şer li herêmê didome. Li dijî van êrişan berxwedana şervanên YPG, YPJ û HSDê mezin e. Gelek êrişên komên çete hatin şikandin. Niha jî li herêmê bi taybet li Bendava Tişrînê êriş berdewam dikin û li dijî êrişan berxwedaneke bêhempa heye.”
‘Gel li Bendava Tişrînê li ber xwe dide’
Zekeriya Şêxo destnîşan kir ku welatiyên Bakur û Rojhilatê Sûriyeyê bi hemû pêkhateyên xwe ve bi yek helwest li dijî êrişan rabûnê ser pêyan û wiha axivî: “Êrişên Tirkiyeyê li ser bendava Tişrînê her ku diçe zede dibe. Welatiyên Bakur û Rojhilatê Suriyeyê jî bi hemû pêkhateyên xwe vê li dijî van êrişan berê xwe dan Bendava Tişrînê. Welatî hem ji bo piştgiriya şervanan meşiyan û hem jî ji bo ewlehiya Bendavê meşiyan û li wir dest bi nobede kirin ku êrişên li ser Bendavê rawestin. Niha gelê Bakur û Rojhilatê Suriyeyê her roj dimeşin. Li dijî êrişên komên çeteyan nobede digirin. Gelê herêmê li dijî êrişan bi helwest e. Berxwedanê mezin dikin. Gel tevî êrişan jî, li Bendava Tişrînê li ber xwe didin.”
‘Tirkiye welatiyên sivîl dikuje’
Di berdewama axaftina xwe de Zekeriya Şêxo bal kişand ser êrişa Tirkiyeyê li ser welatiyên Bendava Tişrînê jî û ev tişt got: “Bi taybet li ser bajarê Minbîcê ku Bendava Tişrînê jî li wir e dewleta Tirk êrişên hovanê pêk tîne. Her roj Bendava Tişrînê rastî topbaranê tê. Ev dibe sedema xetereyan li er welatiyên herêmê. Welatiyên herêmê, dema ku meşiyan Bendava Tişrînê, Dewleta Tirk karwan topbaran kir. Dewleta Tirk êrişî welatiyên sivîl kir. 5 welatiyan jiyana xwe ji dest dan û 15 kes jî birîndar bûn. Lê wan êrişan berxwedana gel neşkand. Welatiyên herême behtir xwedî li berxwedana Bendava Tişrînê derketin. Dema em li vir bi gel re diaxivin dibêjin, ‘Em ji balafir û bombeyên wan natirsin. Îradeya me ji êrişên wan mezintir e. Me çawa ku DAIŞ li Kobanê têk bir, em ê dewleta Tirk jî li Bendava Tişrînê têk bibin.”
‘Bendav biteqe dê gelek gund di bin avê de bimînin’
Di dawiya axaftina xwe de Zekeriya Şêxo anî ziman ku ji ber êrişên Tirkiye û komên çekdar ên giredayî wê ava li Bendava Tişrînê bilind bûye û gotinên xwe wiha qedand: “Rêveberiya Xweser hertim bi daxuyaniyan bang li dewletên navneteweyî dike ku êrişên li ser Bendava Tişrînê rawestînin. Bendava Tişrînê SÎHAyan bombebaran dikin. Dewleta Tirk çeteyên giredayî wê rastê rast Bendava Tişrînê hedef digirin. Bendava Tişrinê nêzî 4 kîlometre mezin e. Ji ber wê jî topbarana li ser Bendava Tişrînê metirsiyeke mezin derdixînê holê. Ji ber ku aveke zêde li Tişrînê kombûye û ew yek jî metirsiya teqîna bendavê bi xwe re tîne. Heke bendav biteqe gelek bajarên Suriyeyê wê bandor bibin. Dibe ku bandor li ser bajarên dewletên din jî bike. Asta bilindbûna bendavê xetereke mezin e. Metirsiya ku gelek gund di bin avê de bimînin heye.”
