Şaredariya Seravê û niştecihên taxa Şerefxaneyê bi hevkarî di encama xebatên komunan de Mala Gel a Ronahiyê vekir.
Şaredariya navçeya Seravê ya Wanê û niştecihên taxa Şerefxaneyê di çarçoveya avakirina xebatên komunan de Mala Gel a Ronahiyê vekir. Biryara avakirina mala gel di sala 2024an de bi niştecihên Şerefxaneyê re hate girtin û di sala 2025an de temelê wê hate danîn. Hemû kar û xebat niştecihan hilgirt ser xwe, şaredariyê jî ji aliyê melzemeyan ve alîkarî da wan. Îro jî bi tevlibûna hevşaredarê Bajarê Mezin ê Wanê Abdullah Zeydan ku qeyim li şûna wî hatiye tayinkirin, Hevşaredarên Seravê Fîlîz Ozturk û Davût Acar, hevserok û rêveberên Partiya Wekhevî û Demokrasiyê ya Gelan (DEM Partî) û niştecihên Taxa Şerefxaneyê bi merasîmekê Mala Gel a Ronahiyê hat vekirin.
‘Piştgiriyê bidinê banga Rêzdar Ocalan’
Hevserokê DEM Partiyê yê Wanê Veysî Dîlekçî di merasîma vekirinê de axivî û bal kişand ser girîngiya komunan. Veysî Dîlekçî diyar kir ku ji bo serkeftina pêvajoyê divê xebatên rêxistiniyê bên xurtkirin û got: “Heke em bikevin rihetiyê û nexibitin, em ê winda bikin. Ji ber vê yekê divê em hercar pirtir xwe rêxistin bikin. Ji bo yekitiya gelê me jî ev yek pêwist e. Divê em hemû xwedî li banga Rêzdar Ocalan derbikevin û piştgiriyê bidinê.”
‘Em ê li vir bi hev re biryaran bidin’
Hevşaredarê Seravê Davût Acar diyar kir ku ev der ne tenê avahiyeke, jiyanekê di hindirê xwe de dihewîne û ev tişt li axaftina xwe zêde kir: “Em dixwazin li vir têgihîştineke civakî pêş bixin. Ev mala gel bi piştgirî û komuna gelê me hatiye avakirin. Malên me yên gel cihên ku dê têgihîştina demokratîk xurt bikin in. Li van malan, em ê li ser pirsgirêkên xwe nîqaş bikin û bi hev re biryaran bidin. Li vir, em ê paradîgmayeke demokratîk û rizgariya jinan bicîh bînin.”
‘Ev der dê weke akademiyekê xizmetê bike’
Hevşaredarê Bajarê Mezin ê Wanê Abdullah Zeydan jî di vekirinê de axivî û ev tişt gotin: “Tevî zehmetiyên aborî yên ku em dijîn jî, hevalên me xizmetên girîng dikin. Wan, ev xizmet bi gel re kirin. Dema ku gel xwe birêxistin dike, çi qas zext hebe jî, xebatên pîroz derdikevin holê. Ev xanî di encama bingeha sereke ya bîrdoziya me de hatiye avakirin. Di banga birêz Abdulah Ocalan a 27ê Sibatê de behsa avakirina civakeke demokratîk jî tê kirin. Armanca vê yekê ew e ku gel xwe bi xwe birêve bibe. Bingeha vê yekê jiyana komunal e. Jiyana komunal ev gel heta îro li ser pêyan hiştiye. Li cihê ku gel, jin, ciwan û zarok lê hebin û biryaran bidin, pirsgirêk çênabin. Dê ji vê malê gelek xebatên girîng derbikevin holê. Ev der dê wekî akademiyekê jî xizmet bike.”
Piştî axaftinan mala gel bi çepikan hat vekirin.
