Amed – Endamê Desteya Rêveberiya HDKê Murat Kalmaz destnîşan kir ku ji bo banga Rêberê Gelê Kurd Abdullah Ocalan têkeve meriyetê, divê her kes piştgiriyê bide bangê û bixebite.
Parlamenterê Partiya Wekhevî û Demokrasiya Gelan (DEM Partî) Omer Ocalan 31ê Adarê çû Girtîgeha Ewlehiya Bilind a Tîpa F a Îmraliyê û bi Rêberê Gelê Kurd Abdullah Ocalan re hevdîtin kir. Abdullah Ocalan ji partiyên siyasî û saziyan re peyamek şand û got ku divê her kes di nav xebatên “rêxistinbûyîn” de be. Piştî peyamê gelek partiyên siyasî û saziyan dest bi xebatên rêxistinê kirin. Yek ji wan jî Kongreya Demokratîk a Gelan (HDK) e. HDKê dest bi xebatên “Hevdîtina Civaka Demokratîk” kir. HDK li bajarên Tirkiyeyê dê bi gel re were cem hev û civînan li dar bixe. HDKê xebata xwe ya yekemîn li ser vê mijarê li navçeya Esenyûrta Stenbolê xebata “Kursiya Azad” li dar xist.
Endamê Desteya Rêveberiya Kongreya Demokratîk a Gelan (HDK) Murat Kalmaz têkildarî xebatên “Hevdîtina Civaka Demokratîk” û ji bo pêşxistina pêvajoyê, ji Ajansa Welat (AW) re axivî.
‘HDK dê bi rol û mîsyona xwe rabe’
Murat Kalmaz da zanîn ku ji bo pêvajo li pêş bikevê û di nava gel de were fêmkirin çi bikeve ser milên HDKê dê bike û wiha got: “Di 1ê Cotmehê 2024an de ev pêvajo hat destpêkir. Rêberê gelê Kurd Abdullah Ocalan 27ê Sibatê banga ‘Aştî û Civaka Demokratîk’ kir. Piştî bangê di nava gel de hêviya çareserî û aştiyê zêde bû. Ew demeke pêvajo di nava gel de tê nîqaşkirin. Piştî demekî dirêj pêvajo dîsa hat destpêkirin, ev pêvajo ne tenê ji bo gelê Kurdistan û Tirkiyeyê ye. Ev pêvajo ji bo berjewemendiya tevahiya Rojhilata Navîn e. Ev bi salan e gelê Kurd li ber xwe dide, bi saya vê berxwedanê îro em behsa pêvajoyê dikin. Piştî peyama rêxistinbûyînê ya Abdullah Ocalan em jî wekî HDKê em ê rêxistina xwe xurt bikin. Em jî wek saziya xwe di nav gel de bin û xwedî li vê pêvajoyê derkevin. HDK ji bo çareserkirina pirsgireka gelê Kurd û Tirkiyeyê xwedî rol e û wê bi rola xwe rabe. Di nava HDKê de gelek partî û saziyên cuda hene ji bo wê rol û misyona HDKê gelek girîng e. Em ji bo banga birêz Abdullah Ocalan were cih, di nava civakê de were nîqaşkirin em ê rol û mîsyona xwe bicih bînin.”
‘Berpirsiyariya vê pêvajoyê li ser milê hemû kesî ye’
Murat Kalmaz da zanîn ku heta ku hemû beşên civakê tev li pêvajoyê bibin dê xebatên HDKê bidomin û ev yek anîn ziman: “Birêz Abdullah Ocalan ya li ser rêxistinê tiştên gelek girîng got, me jî demildest dest bi xebatan kir. Em ê her hefte li cihêkî gel re hevdîtin pêk bînin. Em li ser pêvajoyê li nîqaş û nerînên gel guhdar dikin. Em xwe ji bo pêşxistina pêvajoyê berpisiyar dibînin û em bang dikin ku hemû beşên civakê tev li civînên me bibin. Em bi vê xebatê dixwazin ku pêvajoyê bixin rojeva gel. Birêz Abdullah Ocalan dibêje heta ku gel tev li pêvajoyê nebe pêvajo nagihîje armanca xwe. Berpisiyarê vê pêvajoyê li ser milê hemû beşên civakê ye.”
‘Daxwaza gel azadiya birêz Abdullah Ocalan e’
Murat Kalmaz diyar kir ku ji bo çareserkirina pirsgirêka Kurd hêviya gel zêde bûye û got: “Gel ji bo dewlet gav biavêje bang dike. Daxwaza gel ya sereke rakirina tecrîda li ser birêz Abdullah Ocalan e. Azadiya fizîkî ya birêz Abdullah Ocalan e. Jixwe birêz Abdullah Ocalan ji bo ev pirsgirêk çareser bibe, rêbaz nîşanî dewletê da. Divê dewlet li banga birêz Abdullah Ocalan xwedî derkeve û gavan biavêje. Divê dewlet nêzîkatiya xwe ya ji bo pêvajo eşkere kir.”
‘Birêz Abdullah Ocalan dibêje ez amade me’
Murat Kalmaz bi bîr xist ku Abdullah Ocalan dibêjê ew amade ye ku pirsgirêken li Kurdistanê û Tirkiyeyê tevahî çareser bike û û wiha domand: “Ev bang ne tenê ji bo çarserkirina meseleya gelê Kurd e. Meseleya tevahiya Tirkiyeyê ye. Divê hêzen demokratîk, partiyên siyasî û saziyên civakî xwe tev li vê pêvajoyê bikin. Divê her kes bi rol û mîsyona xwe rabe. Em welê dikarin polîtîkayên faşîzmê û nijadperesetiyê têk bibin. Divê em xebatên xwe berfirehtir û zêdetir bikin.”
‘Armanca HDKê çareserkirina pirsgirêka gelan e’
Murat Kalmaz destnîşan kir ku bi girtinan dixwazin xebatên HDKê werin astengkirin û îlegalîzekirin lê tevî vê yekê jî her dem wê xebatên HDKê bidomin û wiha pêde çû: “Dixwazin di bin navê “Lihevkirina Bajêr’ a li Stenbolê HDKê terorîze bikin û bidin sekinandin. Em dizanin ku ev operasyon siyasî ne. Rol û misyona HDKê civaka demokratîk, aştî û berpirsayariya gelên bindest û tevahiya beşên civakê ye. Ji bo vê yekê ev operasyon pêk hatin. Dewlet eger bixwaze pirsgirêken li Tirkiyeyê werin çareserkirin divê dest ji van operasyonan berde. Ev operasyon nikarin me rawestînin. Ev van operasyonan qebûl nakin.”
‘Êdî divê dewlet gavan biavêje’
Murat Kalmaz di dawiya axaftina xwe de diyar kir ku divê tecrîda li ser Abdullah Ocalan rabe û wiha got: “Birêz Abdullah Ocalan dixwaze ev pirsgirêka bi salan e didome çareser bibe. Birêz Abdullah Ocalan ji bo aştiyê çi were destê wî kiriye û dike. Êdî divê dewlet gavan biavêje. Di serî de divê tecrîda li ser birêz Abdullah Ocalan rabe û şert û mercên wî yên azad werin çêkirin da ku ji bo aştiyê dikaribe bixebite. Bi çûyîn û hatina şandeyê nabe. Gel jî li dijî gavneavêtine bi hêrs e. Hê jî ji her aliyê jiyanê ve pirsgirêkên gelê Kurd berdewam dikin. He jî êrişên li ser Başur û Rojavayê Kurdistanê berdewam dikin. Divê şer bê rawestandin û dewlet demildest gavan biavêje.”
