Kobanê di bin dorpêçê de ye û rewşa jiyanî ji ber vê dorpêçê her ku diçe zehmettir dibe. Şêniyên ji Kobanê diyar kirin ku pêdiviyên sereke, xurek hem kêm în û hem jî bihayê wan giran e.
Ji dema êrişên Çeteyên girêdayî Hikûmeta Demkî ya Sûriyeyê û Tirkiyeyê li Rojava-Bakur û Rojhilatê Sûriyeyê di bin dorpêçê de ye. Taybetî Kobanê di bin dorpêçeke giran de ye. Têkildarî mijarê şêniyên Kobanê ji Ajansa Nûçeyan a Hawarê (ANHA) re axivîn û gotin ku ji ber dorpêça domdar û giran, rewş her ku diçe zehmettir dibe. Herwiha bazirganên Kobanê dan zanîn ku xurek, sebze û pêdiviyên jiyanî kêm tên û ji ber pereyên giran ji wan distînin bihayê wan jî giran dibe.
Hevseroka Desteya Aborî û Çandiniyê ya bajarê Kobanê Sewsen Daban diyar kir k sebze û pêdivyên jiyanî nayên peydakirin û da zanîn ku ew hewl didin ku sebze û hin pêdiviyên din ji bo Kobanê peyda bikin û wiha got: ”
‘Tişt kêm tên û têra bajêr nakin’
“Me hewl da ku em ji rêyên nefermî re hinek sebze derbasî Kobanê bikin. Hejmara gelên ku li Kobanê ye, zêdeyî 500 hezar kesî ye, ev sebze têra gel nakin. Sebeze hem kêm in, hem jî ji ber riyên nefermî de derbas dibin ji erebeyan pereyan distînin ev jî bihayê sebzeyan biha dike.”
‘Ji bo aramiyê divê dorpêç rabe’
Bazirgan Mihemed Dawûd da zanîn ku ji ber di riyên nefermî de sebze tên gelek pere ji wan distînin û got: “Divê dorpêç rabe, da ku gel di aramiyê de be.”
‘Hezar û 200 dolar ji erebeyên mezin distînin’
Bazirganê ji Kobanê Mihemed Dawûd jî destnîşan kir ku ew 45 sal in karê firotina sebzeyan dike û ev tişt gotin: “Sebzeyên me ji Heleb, Bab, Minbicê di rêyên nefermî re derbasî Kobanê dibin. Dema ku bazirgan sebzeyan tînin li ser rê rastî astengiyan tên, ji her erebeyên mezin hezar û 200 dolar distînin. Ji ber vê yekê sebzeyên ku derbasî Kobanê dibin bi bihayeke girantir tên firotin. Ev jî dibe sedem ku gel di destxistina sebzeyan de zehmetiyê dikêşe.”
