HSDê bi operasyonekê dorpêça li ser Meskenê şikand û hêzên xwe ji wir kişandin. Her wiha di encama operasyonê de bi dehan çete hatin kuştin û 4 gundên hatibûn dagirkirin jî hatin rizgarkirin.
HSDê bi boneya binpêkirina peymana vekişînê û dorpêçkirina hêzên xwe yên li Meskenê operasyonek li dijî çeteyên HTŞ û Tirkiyeyê da despêkirin. Di dema ketina hêzên HSDê ya navçeya Meskenê de pevçûnên dijwar qewimîn.
4 gund hatin rizgarkirin
Di encama pevçûnan de bi dehan çete hatin kuştin û dorpêç hate şikandin. Piştî şikandina dorpêçê yekîneyên li navçeyê bi awayekî ewle derketin. Her wiha 4 gundên li rojhilatê navçeyê ku ji aliye çeteyan ve hatibûn dagirkirin jî hatin rizgarkirin.
Cendekê bi dehan çeteyan li kuçeyan in
Li gorî agahiyên çavkaniyên herêmî HSDê darbeyên giran li çeteyan dane û cendekê bi dehan çeteyan jî li kolanan mane. Her wiha di vîdeoyên ku li ser hesabên alîgirên çeteyan de hatin belavkirin de jî termê gelek çeteyan hate nîşandayîn.
HSDê enî ji nûve bi hêz kirin
Fermandariya HSDê gelek yekîneyên nû şandin eniyên şer û sengerên hêzên xwe ji nûve bi hêz kirin. Di encama operasyonên hatin meşandin de û bi çûyîna yekîneyên nû kontrola li ser herêmê bi temamî hate bidestxistin.
