Du cîld pirtûka “Çepera Rûmetê: Kobanê” a yek ji fermandarên şerê Kobanê Meryem Kobanê ji Weşanxaneya Aramê derçû.
Şer û berxwedana Kobanê ya di sala 2014-2015an de li ser zar û zimanan e û her kêliyek wê dibe destan, çîrok, sînema, şano û stran. Piştî gelek filman û pirtûkan vê carê jî pirtûka ku destana Kobanê vedibêje, pirtûka “Çepera Rûmetê: Kobanê” a yek ji fermandarên şerê Kobanê Meryem Kobanê ji Weşanxaneya Aramê derçû. Pirtûk bi awayekî du cîldan derçû. Mijara pirtûkê roman e û qala şer û berxwedana Kobanê tê kirin. Hat zanîn ku dê cilda sêyemîn jî di dorê de ye û dê were çapkirin.
Pirtûk belgeya berxwedanê ye
Pirtûk qala her kêliyek şer dike û şahidiya dîrok û berxwedanê dike. Her rûpelek pirtûkê belgeya şer û berxwedanê ye. Di pirtûkê de tê gotin bê ka şervanên Kurdan li dijî şerê hovane yê DAIŞê li ber xwe dane û ruh û bedena xwe kirin e çeper.
Ew berxwedana Kobanê ku wek berxwedana rûmetê tê binavkirin, tevî ku çend sal bi ser re derbas bûye jî hê jî dengvedana wê li cîhanê berdewam dike. Tevî şerê dijwar jî Kobanê li ber êrişên çeteyên DAIŞê neket xwarê û şervanên Kurd û enternasyonîst bi berxwedanê serkeftina xwe ji cîhanê re ragihandin.
‘Ji pênûsa jineke têkoşer’
Yek ji şahidên berxwedana Kobanê rojnameger Abdurrahman Gok e. Gok bi mehan li çeperan berxwedana Kobanê şopand û wî jî kêlî bi kêlî şahidiya dijwariya şer û berxwedanê kir. Edîtorê pirtûkê rojnameger Abdurrahman Gok li ser hesabê xwe yê Xê derçûna pirtûkê belav kir û wiha got: “Destana ‘Çepera Rûmetê: Kobanê’ ji Weşanxaneya Aramê derket. Têkoşîna li derûdora rûmet û îradeyeke xurt vedibêje. Ji pênûs û şahidiya jineke têkoşer a li ser her bihosteke axa welat şopeke dîrokî hîştiye diniqute. Du cîld çap bûn, cîlda sêyem jî di dorê de ye… Ez bim bixwînin…”
