Amed – Şaredariya Navçeya Sûrê navê Tahîr Elçî li kuçeya Mînareya Çar Ling kir. Hevşaredarên Sûrê dan zanîn ku wan navê remza edalet û aştiyê û bîra civakî li kuçeyê kirin e.
Şaredariya Navçeya Sûrê ya Amedê ya di bin rêveberiya DEM Partiyê de navê Serokê Baroya Amedê Tahîr Elçî li kuçeya lê hatibû qetilkirin, kir. Serokê Baroya Amedê Abdulkadîr Guleç, hevjîna Tahîr Elçî, Turkan Elçî, Hevşaredarên Sûrê Fatma Gulan Onkol û Adnan Orhan, Hevşaredarên Bajarê Mezin a Amedê Serra Bucak û Dogan Hatun, rêveberên rêxistinên bajar ên DBP û DEM Partiyê, nûnerên Weqfa Tahir Elçî, parêzer û nûnerên rêxistinên sivîl û gelek kes tev li merasîma daliqandina tabeleya kuçeyê bûn. Li kuçeyê pankarta “Me Tahîr Elçî yê li ber siya edaletê li şopa aştiyê digeriya ji bîr nekir” hate daliqandin.
Remza edalet û aştiyê
Hevşaredarê Sûrê Adnan Orhan di merasîma daliqandina tabeleya kuçeyê de axivî û wiha got: “Ev kolan ji bo xelkê Amedê ne tenê rê ye, her wiha dê bibe sembola lêgerîna edaletê, cesaret û aştiyê. Weke parçeyeke bangawaziya aştiyê ya li her kolanên Sûrê olan dide, dê mîrateya Tahir Elçî û berpirsyartiyên me bi bîra me bîne. Em soz didin ku dê têkoşîna me ya ji bo pêşerojeke aştiyane bidome.”
‘Em ê hafizeya xwe biparêzin’
Hevşaredara Sûrê Fatma Gulan Onkol jî ev yek anî ziman: “Herêma Sûrê malovaniya gelek şaristaniyan kiriye. Tahir Elçî d ferqa vê de bû û ji bo aştî û parastina van mîrateyan têkoşiya û di oxira wan de jiyana xwe ji dest da. Em soz didin ku dê ji vir bîrekê ava bikin û vê bîrê biparêzin.”
Kuçe têra navê qurbaniyan nake
Hevşaredara Bajarê Mezin a Amedê Serra Bucak jî wiha axivî: “Guherandina navê kolanê pir girîng û watedar e. Erdnîgariya me erdnîgariyeke biêş e e. Em navên kesên me winda kirine çiqasî li kuçeyan bikin jî xelas nabin. Lê pêdiviya me pê heye ku bîra xwe zindî bihêlin.”
‘Hewcedariya herî lezgîn aştî ye’
Hevjîna Tahîr Elçî, Turkan Elçî jî wiha got: “9 sal berê ev kolan bi xwîna hiqûqnasekî daxwaza aştiyê dikir hate qirêjîkirin. Paqijkirina vê kolanê dê ewqas hêsan nebe. Ev 9 sal in em êş û zehmetiya vê dikişînin. Heke tevî zilm û êşê em îro xwe li ser pêyan bigirin, sedema vê hêviya me ye. Biryara şaredariya me ya ji bo paqijkirina vê kolanê daye ji bo me gelek binirx e.”
Piştî axaftinan tabeleya “Kuçeya Tahîr Elçî” hate daliqandin û merasîm bi dawî bû.
