Elewiyên Ereb li dijî komkujiya Elewiyên li Sûriyeyê li ber Meclîsa Tirkiyeyê daxuyanî da. Di daxuyaniyê de jî bo rawestandina komkujiyê bang li desthilatê hat kirin.
Nûnerên sazî û komeleyên Elewiyên Ereb ku li bajarên Edenê, Hatay û Mersînê hatin Enqereyê li dijî komkujiya Elewiyên li Sûriyeyê li ber Meclîsa Tirkiyeyê daxuyanî da. Girseya xwest li ber deriyê Çankaya yê Meclîsê daxuyanî bide ji aliyê polîsan ve hatin astengkirin. Li ser vê yekê girseyê li hemberî Meclîsê daxuyanî da. Endam û nûnerên partiyên siyasî, komele, saziyên Elewî û Parlamenterên DEM Partiyê Celal Firat, Ayten Kordu, Perîhan Koca jî tev li daxuyaniyê bûn. Di daxuyaniyê de pankarta li ser, “Komkujiya li dijî Elewiyên Sûriyê rawestînin” dinivisî hat vekirin.
Her wiha girseyê dovîz û wêneyên ku komkujiya Elewiyan şermezar dikir jî hilgirtin. Girseyê bê navber dirûşmeyên wek, “Kujer Colanî bila bê darizandin”, “Ji komkujiya Elewiyan re bêdeng nemîne” û “Gelê Elewî ne bi tenê ye” berz kir.
Beriya daxuyaniyê rojnameger û pîsporê Rojhilata Navîn Musa Ozugurlu axivî û anî ziman ku Elewî bi komkujiyeke mezin re rû bi rû mane û got ku divê bêdengiya li dijî vê komkujiyê bi dawî bibe û Tirkiye û dinya li dijî vê komkujiyê rabe ser pêyan. Musa Ozugurlu destnîşan kir ku heke Tirkiye bixwaze dikare bi telefoneke vê komkujiyê rawestîne û bang li desthilata AKPê kir ku beriya aloziyeke mezin bikeve nava hewldanê.
‘Bêdengî hevkarî ye’
Metna daxuyaniya hevpar ji aliyê Serokê Komeleya Piştgiriya bi gelê Elewiyên Ereb re Hamît Karaoglarindan ve hat xwendin. Hamît Karaoglarindan bi lêv kir ku tundiya li dijî Elewiyên li Sûriyeyê veguheriyê komkujiyeke sîstematîk û wiha got: “Divê raya giştî ya Navneteweyî bikevê nava hewldanê. Ev bêdengî nayê qebûlkirin. Pêvîstê dewletên navneteweyî, saziyên navneteweyî û raya giştî li dijî vê komkujiyê bikeve nava tevgerê. Bêdengî hevkarî ye.”
Daxwazên saziyên Elewiyan
Hamît Karaoglarindan diyar kir ku ew bi hemû gelên rastî komkujiyê tên re di nava piştgiriyê de ne û daxwazên xwe wiha rêz kir: ”
* Divê êrişên qirkirinê yên li dijî Elewiyan tavilê werin rawestandin.
* Divê civaka navneteweyî mekanîzmayên bersivdayînê yên lezgîn û bibandor bicîh bîne.
* Divê korîdorek alîkariya mirovî were avakirin, ku ji Deriyê Sînor ê Yayladagiyê dest pê bike. Meclîsa Tirkiyeyê di vî warî de erk û berpirsiyariya xwe pêk bînê.
* Divê herikîna alîkariya mirovî ji bo herêmê were xurtkirin û rêxistinên navneteweyî bi lez bigihîjin qadê.
* Divê hemû gel û bawerî di pêvajoyên siyasî yên têkildarî pêşeroja Sûriyeyê de werin temsîlkirin.
‘Divê heyetek ji parlamenteran derbasî Sûriyê bibe’
Piştî daxuyaniyê parlamenterê DEM Partiyê Celal Fırat jî axivî û bertek nîşanî komkujiyan da û wiha got: “Yên ku Colanî di qesran de pêşwazî dikin berpirsên vê komkujiyê ne. Divê desthilat êdî ji komkujiyê re bêdeng nemîne. Divê êdî ev komkujî bên rawestandin. Em bang li Wezîrê Karên Derve Hakan Fîdan dikin ku heyetek ji parlamenteran bişîne Sûriyê û ev komkujî bên rawestandin. Heke ji Meclîsê komîsyonek neçe jî weke DEM Partiyê em ê biçin.”
Piştî daxuyaniyê heyetek ji bo hevdîtina bi partiyên siyasî yên li Meclîsê re derbasî Meclîsê bû û dê bi partiyên siyasî re hevdîtin pêk bîne.
