Bi pêşengiya MEBYA-DERê serdana bîranîna gerîlayên PKKê Netîce Kozat û Cegerxwîn Mizrak hate kirin. Hevseroka MEBYA-DERê Gurbet Sevîktek got: “Em ê xewn û xeyalên şehîdên xwe pêk bînin.”
Gerîlaya PKKê Netîce Kozat (Nesrîn) di sala 1996an de li navçeya Dara Hênê ya Çewlîgê û endamê PKKê Cegerxwîn Mizrak (Şoreş) jî di sala 1998an de li navçeya Pîranê ya Amedê jiyana xwe ji dest dabûn. Nasnameya wan nû hate ragihandin. Malbatên wan ji bo bîranîna ewladên xwe li Mala Şînê ya Şemrexê ya li navçeya Rezana Amedê pêşwaziyê li mêvanên xwe dikin.
Bi pêşengiya Komeleya Piştevanî û Alîkariyê ya bi Malbatên Xizmên Xwe li Dergûşa Şaristaniyê Winda Kirine re (MEBYA-DER) serdana bîranînê hate kirin. Rêveberên MEBYA-DERê, rêveberên DEM Partî, DBPê, rêveberên rêxistinên sivîl, Dayikên Aştiyê û aktîvîstên TJAyê û gelek kes çûn serdana bîranîna herdu gerîlayan. Di bîranînê de fatîha hatin xwendin û rêz ji bo cangoriyên têkoşîna azadiyê hate girtin.
‘Em ê xewn û xeyalên şehîdên xwe pêk bînin’
Hevseroka MEBYA-DERê Gurbet Sevîktek axivî û got: “Îro li dunyayê armanc û dawxaza Kurdan çi ye? Divê em viya bizanibin. Em bi saya van şehîdan gihîştin vê qonaxê û em hînî vê têkoşînê bûn. Em bi têkoşana wan hatin vê astê. Ji heft salî heta heftê salî çi ji destê me bê em ê bikin. Heta ku ji destê me bê em ê xewn û xeyalê şehîdên xwe bînin cih. Em dîsa dibêjin serê malbat û gelê me û serokatiya me sax be.”
