Stenbol – Sirri Sureyya Onder ku duh bi şev krîza dil derbas kir, nêzî 12 seatan di emeliyatê de ma. Piştî emeliyatê ew derxistin serwîsa linihêrîna awarte. Rewşa Onder a xeternak berdewam dike.
Endamê Şandeya Partiya Wekhevî û Demokrasiyê ya Gelan (DEM Partî) ya Îmraliyê û Serokwekîlê Meclisê Sirri Sureyya Onder duh bi şev krîza dil derbas kir. Saet di 23.00an de li Nexweşxaneya Florence Nightingale ya li Stenbolê ew hildan emeliyatê. Hat zanîn ku damarê aortê yê Onder qetiyaye û lewma hat emeliyatkirin. Hat diyarkirin ku nêzî 12 seatan di emeliyatê de maye. Piştî emeliyatê ew derxistin serwîsa linihêrîna awarte. Hat zanîn ku rewşa wî ya xeternak berdewam dike.
Serdanên ji bo Onder didomin
Hevserokên DEM Partiyê yên Giştî Tulay Hatîmoglari, Tuncer Bakirhan, Berdevka partiyê Aysegul Dogan û parlamenterên DEM Partiyê li ber nexweşxaneyê rewşa Onder dişopînin û mêvanên xwe pêşwazî dikin. Her wiha gelek nûner û rêveberên partiyên siyasî û rêxistinên sivîl jî li nexweşxaneyê ne. Heta niha gelek kesan serdana nexweşxaneyê dikin û ji Hevserokên Giştî yên DEM Partiyê rewşa Onder dipirsin.
Tê payîn DEM Partî û bijîşk di kêliyên pêş de derbarê rewşa Onder de daxuyaniyê bidin.
