Encama pêşbirka Xelatên Rojnamegeriyê ya Mûsa Anter û Şehîdên Çapemeniya Azad hate aşkerakirin. Xelat, dê di 20ê Îlonê saet di 18.00an de li Navenda Çandê ya Cem Karaca ya li Bakirkoy a Stenbolê bi merasîmekê bên dayin.
Beşa Kurdî
Juriya beşa kurdî ku ji Sîma Birokê, Munever Karademîr, Îdrîs Kara, Bişar Durgut û Ramazan Olçen pêk dihat, tu serlêdan hêjayî xelatê nedît. Juriyê di daxuyaniya xwe de got:
“Silav û rêz;
Em, ewil di şexsê Apê Mûsa û Gurbetellî Ersoz de hemû şehîdên Çapemeniya Azad bi rêzdarî bi bîr tînin û ji bo hemû kedkar û xebatkarên wê serkeftinê dixwazin.
Helbet cihgirtina di organîzasyoneke wiha girîng û pîroz de, ji bo me kedkarên Çapemeniya Azad cihê serbilindî û şanaziyê ye.
Ji bo ‘Beşa Nûçeyên Kurdî’, 6 nûçegihanan serlêdan kirin. Nûçe, yek bi yek ji hemû endamên juriyê re hatin şandin. Ewil hemû endamên juriyê bi berfirehî û dubareyî nûçe xwendin û piştre jî bi beşdariya hemû endaman civîneke nirxandin û nîqaşan hat lidarxistin.
Di civînê de her nûçe yek bi yek ji hêla naverok, şêwaza hûnandinê, hêmanên nûçeyan, armanc, wêne, dîmen, rêziman, lêkolîn, taybetî, cudahî û hwd. ve hat nirxandin.
Endamên Juriyê; ji ber keda dayî, yek bi yek spasiya hemû nûçegihanên serî li pêşbirkê dane, kirin. Endaman, destnîşan kir ku her mijara hatiye destgirtin, ji hêla civakî, çandî, dîrokî, hunerî û hwd. ve heqîqetekî îfade dike û hêjayî nirxandinê ne.
Ji nûçeyên hatine şandin sê (3) jê di asta nûçeyên rûtîn de bûn lewma hêjayî xelatê nehatin dîtin.
Li ser sê nûçeyên mayî jî nîqaşên dirêj hatin kirin. Mijar girîng û balkêş bûn û teqabûlê rastiyeke dilêş dikirin. Lêbelê, ji ber ku hêmayên nûçeyan kêm bûn, hûnandina nûçeyan qels bû, dubare tê de zêde bûn, gelek pirsên jêderka naveroka nûçeyê bi xwe nehatibûn bersivandin û li gel vê, ji ber ku di asta nûçeyên rûtîn de hatibûn hiştin, juriyê hêjayî xelatê nedîtin.
Weke encam; endamên Juriya Kurdî, tu yek ji nûçeyên hatine şandin hêjayî xelatkirinê nedîtin.
Em careke din spasiya hemû kesên keda wan di organîzasyonê de heye, ji hemû serlêdêrên pêşbirkê û hemû kedkarên Çapemeniya Azad dikin û di xebatên wan de ji wan re serkeftinê dixwazin.”
Beşa Tirkî
Di Beşa Tirkî de endamên juriyê Banu Guven, Faruk Bîldîrîcî, Alî Duran Topuz, Candan Yildiz, Nezahat Dogan û Mehmet Alî Çelebî, ji Bîr+Bîr Expressê nûçeya Adem Ozgur a “Rêwîtiya ber bi Welatê Xerîbiyê ve (Welatê Xerîbîye’ye Yolculuk) hêjayî xelata yekemîniyê dît. Ji HalkTv.com.trê nûçeya Cengîz Karagoz a bi sernavê “Dema derket holê ku zarokê pê re şer kiribûn zaroka qeymeqam e jiyana wan wêran bû: Tiştên li qereqola Mezîtliyê hatin jiyîn hişê mirov ji serê mirov dibe (Kavga ettikleri çocuğun babası kaymakam çıkınca hayatları karardı: Mezitli karakolunda yaşananlar kan dondurdu)” hêjayî Xelata Taybet a Juriyê hat dîtin.
Juriyê, di Beşa Vîdeo-Nûçeya Bidîmen de jî ji Vosy Mediayê xebata Mûrat Baykara û Tuncay Ogreten a bi sernavê “Li Vatanê Îşkence: Li Pey Raporên Derbkirinê yên Tên Veşartin (Vatanda İşkence: Gizlenen Darp Raporlarının İzinde)” hêjayî xelata yekemîniyê dît.
Beşa Wêneyan
Endamên juriya Beşa Wêneyê Oznûr Deger, Mûrat Baykara, Salih Yeşîl, Ozcan Yaman û Ramazan Ozturk, bi piraniya dengan wêneyê bi mijara “Koç (Göç)” hêjayî xelata yekemîniyê dîtin.
Beşa Karîkaturê
Juriya ku ji Asli Alpar, Erceren, Kemal Gokhan Gurses û Ronî Batê pêk tê, xelata yekemîniyê da karîkatûra Nûrî Dogan a bi sernavê “Ne Keser (Keder Değil)”. Juriyê, karîkatûra Mahmût Ulusan (Di Girtîgeha Eregliyê ya Konyayê de ye) jî hêjayî Xelata Taybet a Juriyê dît.
Rojnamegeriya Jinan
Endamên juriya Rojnamegeriya Jinan Arjîn Dîlek Oncel, Derya Ceylan, Elîf Ekîn Saltik, Gulfem Karataş û Bîrcan Degîrmencî tu nûçeyên ji bo pêşbirkê hatin şandin hêjayî xelata yekemîniyê nedîtin. Juriyê, ji JINNEWSê nûçeya Elfazî Toral a bi sernavê “Dav bi dav têkoşîna aştiyê (İlmek İlmek Barış Mücadelesi)” ku çîroka Dayikên Aştiyê vedibêje, hêjayî Xelata Taybet a Juriyê dît.
