Hunermenda Kurd Eyşe Şan di salvegera 29emîn a wefata xwe de li ser gora xwe ya li Goristana Yenîkoyê hate bîranin.
Ayşe Şan di 29emîn salvegera wefata de li ser gora xwe ya ku li Goristana Yenîkoyê ya Amedê di saet 13.00an de hate bîranîn. Li ser gora Eyşe Şan yasîn hate xwendin. Merasîma bîranînê ji hêla Şaredariya Bajarê Mezin, Komeleya Çand Huner û Wêjeyê ya Jinan (KASED), MA Music û Komeleya Çand û Hunerê ya Dîcleyê ve hate lidarxistin. Di merasîmê de wêneyên Eyşe Şan danî ser gorê û kesên tevlî merasîmê bûn wêneya Eyşe Şanê bi sînga xwe daliqandin . Merasîm bi xwendina Yasînê destpê kir. piştî xwendina Yasînê, Seroka Daîreya Çand, Huner û Karên Civakî Zeynep Yaş, Hevberdevka Meclîsa Şaredariya Mezin a Amedê Demet Ceylan, kurê Eyşe Şan Murat Kersen, Nivîskar Yuksel Avşar, Endama MA Musicê Evîn Dulek û Hevserokê Komeleya Çand û Hunera Dîcle û Firatê Celal Ekîn axaftin kirin. Piştî axaftina girseyê qurnefîl danîn li ser gora Eyşe Şan.
‘Em mînetarê keda Eyşe Şan in’
Seroka Daîreya Çand, Huner û Karên Civakî ya Şaredariya Bajarê Mezin a Amedê Zeynep Yaş, Eyşe Şan bîr anî û ev tişt gotin: “Nêzikî 6 mehe Eyşe Şan gihîştiye war û welatê xwe. Em dibêjin bi xêr hatiye. Em gelek mînetarê ked a wê ne.”
‘Bila hatina Eyşe Şanê bibe sedemê aşitiyê’
Piştî axaftina Zeynep Yaş, Nivîskar Yuksel Avşar diyar kir ku 4 – 5 sal e ji bo ku gora Eyşe Şan bê Amedê xebitiye û wiha got: “4 -5 sal e di gel zarokê Eyşe Şan ez di têkiliyê de bûm. Ez niha piçekî xemgînim divê hemû Kurd li vir bûna, Eyşe Şan dîtibûna. Bila hatina Eyşe Şan bibe sedemê aştiyê, aramiyê, yekitiya gelê Kurd û bibe xwiş-biratiya Kurdan”
Hevberdevka Meclîsa Şaredariya Mezin a Amedê Demet Ceylan ji bo salvegera Eyşe Şan ev tişt gotin: “Bi rastî hem kêfxweşiyeke hem jî dilê me zîz e. Ji êdî Eyşe Şan emanetî gelê Kurd e, emanetî me ye, emanetî gelê Amedê ye.”
Endama MA Musicê Evîn Dulek jî ji bo salvegera wefata Eyşe Şan axivî û wiha got: “Em Eyşe Şan tenê bi stranê wê ve nas nakin. Em wê bi têkoşîna ku li dijî feodalîzmê dayî em nas dikin. Eyşe Şan bi navê hunermenda nemir di dîrokê de cih girt. Em ê xwedî li mîrateya wê derkevin.”
‘Dayika min emanete hem welatiyê xwe ye’
Kurê Eyşe Şan Murat Kersen diyar kir ku salvegera wefata dayika xwe ya di 29emîn de kêfxweş e ku wesiyeta wê bi cih hatiye û wiha got: “Em îro ji bo salvegera dayika min a 29emîn li vir in. Me dayika min anî ax û warê wê piçekî dereng bû li gorî wesiyeta wî derfet çê nebûn ku em zûtir bînin. Ez niha pir kêfxweş im ku me ew anî li vir. Êdî dayika min emanetî hem welatiyê xwe ye.”
‘Wekî qehremanekê jiya’
Hevserokê Komeleya Çand û Hunera Dîcle û Firatê Celal Ekîn bal kişand li ser tekoşîna Eyşe Şan a hunerî û ev tişt gotin: “Eyşe Şan ji bo çand, ziman û hunera Kurdî bingehe. Di nav şert û mercên serdestiya mêran li ser jina, li ser çand û hunerê ji nav wan pirsgirêkan de şerekî pir mezin nîşan daye. Wekî qehremanekê jiya.”
