Riha – Bi boneya 4ê Nîsanê roja rojbûna Rêberê Gelê Kurd Abdullah Ocalan li Xelfetiyê dê mihrîcan bê lidarxistin. Girseya ku kom bûne, beriya mihrîcana ku saet di 13.00an de dest pê bike govend gerandin
Bi boneya rojbûna 76emîn a Rêberê Gelê Kurd Abdullah Ocalan dê îro saet di 13.00an de li Parka 4ê Nîsanê ya navçeya Xelfetiyê mihrîcana bi dirûşma “Bi Rêbertiya azad ber bi civaka demokratîk ve” bê li darxistin. Welatî û siyasetmedarên li ber avahiya Partiya Wekhevî û Demokrasiyê ya Gelan (DEM Partî) a Xelfetiyê kom bûn. Girseyê beriya mihrîcanê govend gerandin. Dê ji avahiya partiyê ber bi qada mihrîcanê ve meş were lidarxistin. Ji bajarên bakurê Kurdistanê û Tirkiyeyê bi hezaran kes ji bo tev li mihrîcanê bibin di rêyan de ne. Li qada mihrîcanê amadekarî ber bi temamkirinê ve diçin. Di çarçoveya mihrîcanê de wê konser û panel bên lidarxistin û axaftin bên kirin. Mihrîcan dê heta derengê şevê berdewam bike. Meclisa Ciwanan a DEM Partiyê ku bi dirûşma “Em bi civaka demokratîk ber bi azadiyê ve dimeşin” sê roj in dimeşin dê saet di 16.00an de tev li mihrîcanê bibe. Mihrîcan dê sibê jî heta nîvro bidome. Dû re dê di pêşengtiya Tevgera Jinên Azad (TJA) de ber bi Amarayê meşek were lidarxistin.
Girse ber bi Parka 4ê Nîsanê ve meşiya. Girse piştî li vir govend gerand bi dirûşmên “Rojbûna te pîroz be ey Serok Apo” , “Bijî Serok Apo” , “Bê Serok Jiyan Nabe” , “Ciwan fedayiyên Serok Apo ne” û “Jin jiyan azadî” ber bi Parka 4ê Nîsanê ve meşiyan. Girseya ku gihişt parke li vir li ber stranan govend gerand.
