Wan – Rojnameger Îkram Balekanî derheqê serhildanên gel yên ku li Îran û Rojhilatê Kurdistanê berdewam dikin axivî e got: “Gel serî li hember zilmê radike, mesele tenê ne aborî ye.”
Çalakîyên Rojhilatê Kurdistanê û Îranê 16 roj in berdewam dikin. Çalakiyên ku ji ber krîza aborî derketibûn, veguherîn serhildaneke giştî. Li gelek bajar û bajarokên Rojhilatê Kurdistanê û Îranê bi milyonan kes derdikevin qadan û çalakiyan li dar dixin. Rojnameger Îkram Balekanî derbarê serhildanê de ji Ajansa Welat (AW) re axivî û rewşa Rojhilatê Kudistanê û Îranê nirxand.
Îkram Balekanî destnîşan kir ku serhildana gel bênavber didome û diyar kir ku pêşî li paytexta Îranê, Tehranê ev çalakî dest pê kirin. Îkram Balekanî anî ziman ku ev çalakiyên ji ber aboriyê veguherî serhildana gel û ev tişt got: “Heta niha nêzî 800 bajar, navçe û bajarok tev li çalakiyan bûne. 2 hezar 400 kes hatina desteserkirin û 57 kes jî şehîd bûne. Ji van kesan 167 kes ji hejdeh saliyê biçûktir in. 48 kes xwendekarên zanîngehê ne û beşeke mezin ya şehîdan jî ji Rojhilatê Kurdistanê ne.”
‘1979an de meleyan dest danî ser şoreşa gel’
Îkram Balekanî bal kişand ser serhildana 1979an a li hemberî Şah û got: “1979an gel dijberî şah serî rakir. Şoreş ya gel bû. Lê belê Humeynî û meleyan dest danîn ser şoreşê û çepgir, Kurd û yên din taswiye kirin. Li dijî gelê kurd cîhad îlan kirin. Tenê ne Kurd li hemberî gelek kesan ev cîhad ragihandin. Bi vî şeklî dest danîn ser şoreşa gel. Dibêjin Îran ji aliyê çavkaniyên xwezayî ve gelek dewlemend e. Ji aliyê petrol û gazê de gelek dewlemend e. Lê rejîma niha malê gel didize. Dide Yemenê, Libnanê, Hizbûllahê, Sûrîye, Îraqê, Haşdî Şabî û tiştekê nade gel.”
BBC bal kişand ser bandora Abdullah Ocalan
Îkram Balekanî da zanîn ku gelê Rojhilat û Îranê serî li hember zilmê radike û mesele tenê ne aborî ye. Îkram Balekanî bal kişand ser serhildana “Jin jiyan azadî” û ev tişt li axaftina xwe zêde kir: “Me ev di serhildana ‘Jin jîyan azadî’ de jî dîtibû. Bi sloganekî dest pê kir ku afirînerê wê sloganê Rêberê Gelê Kurd Abdullah Ocelan e. BBCyê dosyayek berfireh çêkir û wek serenav bal kişand ser ‘ji hucreya yek kesî ya Îmralîyê hetanê kolanên Îranê Jin Jîyan Azadî’. BBC, behs dike û dibêje ku Abdullah Ocalan dibêje ‘Heta jin azad nebe civak azad nabe’. Dosya bi wî avayî bû.”
Li rojhilatê Kurdistanê rewşa partiyên siyasî
Îkram Balekanî di berdewamiya axaftina xwe de bal kişand ser rewşa partiyên siyasî yên Kurdan û wiha pê de çû: “Partiyên Kurdan, di serhildana ‘Jin jiyan azadî’ de ders girtin. Kolanan de gel xurt e û îşkenceyê, girtinê, mirinê ber bi çaw digire. Kes partî û birdoziya kesê pirs nake û hemû bi hev re li ber xwe didin. Partiyan, di şoreşa ‘Jin jiyan azadî’ de nekarîn helwesta xwe bikin yek û bi hevra tew bigerin. Niha hemû partîyên Kurdistanê ba hev in, bi navê ‘odeya dîyalogê’ komîteyek ava kirine. Her çend di nava xwe de ji aliyê pratîkê, îdeolojî û xebatê ve nakokiyên xwe hebin jî di dîalogekê de ne û bi navê ‘odeya dîalogê’ bang li gel kirin. Çalakîyên giştî dan dest pêkirin û encama wê pir baş bû.”
‘Partiya herî dînamîk PJAK e’
Bi domdarî Îkram Balekanî derbarê rola partîyên Rojhilatê Kurdistanê de ev tişt anî ziman: “Li Rojhilat keda gelek partiyan heye, yên kevnar jî hene, lê ya herî dînamîk û aktîf PJAK e. Gelek partiyên din yên Kurdan hebûn lê ji ber zext û zoriyên Îranê li Başûr pêşmergeyên wan bê çek hatin hiştin, gelek qels kirin û şervanên wan ji Başûr derxistin. Tenê PJAKê ev yek qebûl nekir. Lewma tenê PJAKê hêzên xwe yên çekdar hene. PJAK heta Îlamê, Hemedanê, Loristanê, Kirmaşanê çûye. Partiyên din tenê li heremên sûnî diman. Cara yekem bi PJAKê çeper evqas berfireh bû. PJAK dibêje ku ew giringî didin perwerdeya civakê, ku civak bi xwe bêminet bibe. Ya giring ew e ku komîteyeke hevbeş ya dîplomasiyê û xweparastinê çêbikin. Gelek caran jî pêşnîyar tên kirin, PJAK pêşnîyar dike û dibêje heke komîteya rêveberiya gel bê avakirin, ew amadene leşkerên xwe dewrî hêzên YNK û yên HPG bikin û bi vî avayî her partî dikare sîyaseta xwe bike. Ya herî girîng ew bû komîteyek hevbeş ya dîplomasî û komîteya parastinê çêbikin, da ku hemû şervan, pêşmerge û gerîla bi hevre parastina giştî ya Rojhilat bikin.”
‘Gel şivanan naxwaze’
Îkram Balekanî diyar kir ku gefên hêzên hegemonîk, tenê destê Îranê xurt dike û axaftina xwe wiha bi dawî kir: “Çalakvanan weke eskerên Emerîkayê û Îsraîlê nîşan dide û kuştina wan ji xwe re helal dike. Ev gotinên devkî tenê destê wan xurt dike. Heke niyeta Trump hebe, çawa înternet dane Ukraynayê, dikare bide Îranê jî. Wê çaxê gelên Îranê dikarin dengê xwe bigihînin cîhanê, agahî bidine hev û xwe organîze bikin. Heke rast dibêjin dikarin bibin dengê gel û hêza wan xurt bikin, serhildanê xurt bikin. Piştî daxuyaniya Trump, Dadgeha Bilind ya Îranê dibêje ku ew rehmê bi çalakvanan nakin. Serokê Olî yê Îranê Xamenayî radibe dibêje ku ew ê SPAyê bişînin nav bajaran. Ji bo komkujîyan pêk bînin vê dibêje. Em ji vê yekê dibînin ku destê rejîmê xurt dikin. Ji hewayê êrîş jî ne çare ye. Rejîm dê derbê bixwe, bes wê ji kolanê rizgar bibe. Tekane rê ew e ku piştgiriya şoreşa gel bikin. Li Îraqê, li Sûrîye ev piştgirî çênebû. Îro jî li Sûrîye hevdû dikujin. Nabe ku tu yekî bînî deynî li ser serê wan. Gerek gel bi xwe biryar bide. Gel şivanan naxwaze. Gel alternatîfa xwe bi xwe diafrîne.”
