Gelê Mexmûrê bi meşek girseyî êrişên li ser Rojavayê Kurdistanê hatin şermezar kirin û peyama parastina nirxên şoreşê hatin dayîn. Li Şengalê jî bi hezaran kes meşiyan û daxuyandin ku dê Rojava bi ciwan û zarokên xwe re biparêzin.
Gelê Wargeha Penaberan a Şehîd Rustem Cûdî (Mexmûr) bi boneya 1ê Sibatê Roja Piştevaniya Rojava ya Cîhanê meş li dar xist. Meşê ji ber bavahiya Saziya Malbatên Şehîdan dest pê kir û heta ber avahiya Neteweyên Yekbûyî berdewam kir. Di meşê de bênavber sloganên, “Bijî Serok Apo”, “Bijî berxwedana Rojava” û “Bijî berxwedana HSDê” hatin avêtin. Girseya al û rengên Kurdistanî rakirin, posterên Rêberê Gelê Kurd Abdullah Ocalan bilind kirin.
Ligel hemû êrişan jî şoreşê nirx afirandin
Hevşaredarê Wargehê Edban Yilman li ser navê girseya gihişt ber avaniya NYê axivî û silav da berxwedana Rojavayê Kurdistanê. Yilmaz wiha axivî: “Li ruxmê hezaran şehîd, bi bedelên giran, koçberî, qirkirin û hemû curên êrişan berxwedanek bêhempa destkeftiyên mezin bi xwe re anîn. Wek gelê Kurd li her çar aliyan xwedîderketinek mezin li vê şoreşê hate kirin. Rojava bi sekin û berxwedêriya xwe yekîtiya gelê Kurd li her çar aliyên Kurdistanê da nûkirin û rûhê yekîtiyê da xurtkirin.” Yilmaz xwest ku gelê Kurd yekîtiya xwe xurt bike û têkoşîna li dora Rojava mezin bike.
Şengal: Em dê bi ciwan û zarokên xwe Rojava biparêzin
Gelê Şengalê bi hemû pêkhateyên xwe û hêzên siyasî bi boneya 1ê Sibatê Roja Piştevaniya Rojava ya Cîhanê meşek li dar xist. Nûnerên civaka Êzidî û Ereb, Rêveberiya Xweser, YNK û TAJÊ tev li meşê bûn. Girseya li ber Mekteba Zarîfe Osê (Mekteba Sor) ya li navenda Şengalê kom bû, heya çerxerêya Yermûk a Şengalê meşiya. Di meşê de pankarta, “Rojava û Şengal yek e” hate rakirin û dowîzên, “Berxwedan jiyan e”, “Bijî yekîtî”, “Berxwedana jinê, hebûna jiyanê ye” û “Jin jiyan azadî” hatin rakirin. Di meşê de timî diruşmên, “Rojava û Şengal yek e” û “Bijî berxwedana Rojava” hatin gotin. Wêneyên şehîdên berxwedana Rojava û zarokên hatine qetilkirin hate rakirin.
‘Roja xwedî derketina Rojava ye’
Cîgirê Berpirsê Malbenda YNKê ya Şengalê Hecî Mirad axivî û diyar kir ew weke hemû pêkhateyên Şengalê tevlî meşê bûne. Midar wiha axivî: “Ew çawa di rojên zehmet de xwedî li me derket, îro ji me jî tê xwestin em bi wan re bin.” Li ser navê TAJÊ Riham Hesen jî dazanîn ku ew êşa gelê Rojava ji kûr de hîs dikin û wiha domand: “Weke civaka Êzidî ji herkesê zêdetir em êşa wan hîs dikin. Ji ber ku li Şengalê û Rojava îradeya azad hatiye avakirin, dagirker timî êrişê van herdu cihan dikin. Tevî hemû êrîşên hovane û êşên mezin jî, tu hêz nikare îradeya bi hêz a gelê Rojava bişikîne. Serkeftina Rojava bi hêza gel bûye. Berxwedaniya ku bi saya gel pêş ketiye, tu hêz nikare tune bike.”
‘Em bi ciwan û zarokên xwe alîkarî bikin’
Li ser navê Serokêşîrên Şengalê jî Hisên Xelîl dazanîn ku civaka Êzidî xwedî derketina li Rojava weke deynekî dibînin û wiha domand: “Di rojên herî zehmet de gelê Rojava li me xwedî derket. Niha em jî weke deyneke li ser xwe dibînin ku li kêleka gelê xwe yê Rojava bin û li dijî wan êrîşên hovane bêdeng nemînin. Em amade ne bi ciwan û zarokên xwe piştgiriya Rojava bikin û biparêzin.” Meş bi çepik û sloganan bi dawî bû.
