Amed – GOÇ-DERê ji bo tev li komîsyona ku dê di Meclisê de were avakirin bibe ji Meclisê re daxwazname şandin. Rêveberê GOÇ-DERê Hakan Şeker diyar kir ku ew amade ne ku peywîra xwe ya di pêvajoyê de bi cih bînin.
Komeleya Lêkolîn Çavdêrî û Koçê ya Mezopotamyayê (GOÇ-DER) bi daxwaza ku di komîsyona li Meclisê bê avakirin de cih bigire li ber postaxaneya li semta Ofîsê ya navçeya Yenîşehîr a Amedê daxuyaniyê da. Endam û rêveberên komeleyê tev li daxuyaniyê bûn. Rêveberê GOÇ-DERê Hakan Şeker di daxuyaniyê de axivî.
‘Em dixwazin di nava çareseriyê de cih bigirin’
Hakan Şeker diyar kir ku ji ber politîkayên dewletê bi hezaran gund hatin valakirin, gelek kes koçber bûn û wiha got: “Ji ber van politîkayên dewletê di hişê gel de travma derket holê. Dema gelê me hat koçberkirin îşkence li gelek kesan hate kirin. Piştî ewqas salan kesên ku hatine koçberkirin dixwazin vegerin gundên xwe lê rastî astengiyan tên. Em wekî Komeleya Koçberiyê dixwazin di nava çareseriyê de cih bigirin.”
‘Divê gav bên avêtin ku aşti pêş bikeve’
Hakan Şeker destnîşan kir ku ew weke komele dixwazin di nava komîsyona li Meclisê bê avakirin de cih bigirin û axaftina xwe wiha dawî kir: “Komeleya me rastiya herêmê dizane. Ji bona vê cih girtina me ya di nava komîsyonê gelek giring e. Divê gav bên avêtin ku aştî pêş bikevê. Em li vir dibêjin ku em amade ne ku peywîra xwe bi cih bînin.”
Piştî axaftinê endam û rêveberên GOÇ-DERê bi daxwaza tev li komîsyonê bibin bi rêya PTTê ji Meclisê re daxwazname şandin.
