Parêzgarê Silêmaniyê diyar kir ku cezayên Tirkiyeyê yên li ser Balafirxaneya Navnetewî ya Silêmaniyê ne yasayî ye û got: “Divê aliyên peywendîdar hewl bidin vê mijarê çareser bikin.”
Parêzgarê Silêmaniyê Dr. Heval Ebûbekir têkildarî beşdariya xwe ya di Newroza Amedê û cezayên dewleta Tirk ên li Balafirxaneya Navnetewî ya Silêmaniyê axivî û wiha got; “Ez weke erkê xwe dizanîn ku peyama pîrozbahiya Bakurê Kurdistanê ji we re ragihînim. Di rojên borî de ez li Newroza azadiyê ya Amedê bûm. Ez hêvî dikim Newroza îsal bibe wesîleya bidawîbûna hemû nexweşî û êşên gelê Kurd ku li kûdera cîhanê bin.”
Di dewamê de got; “Ez di wê baweriyê de me ku gelê Kurd bi yekgirtî derbazî qonaxeke nû bibe ku niha gelek welatên cîhanê eleqeyê nîşanî doza Kurd didin. Ji bo gelê Kurd bikaribe vê pêvajoyê biparêze, bigihe armanca xwe ya ku bi dehan salane jêre bedel û qurbanî dane, divê di nav xwe de yekîtiya xwe biparêze û xwedî bername bin.”
Têkildarî qedexekirina geştên Balafirxaneya Navnetewî ya Silêmaniyê bo Tirkiyeyê jî Dr. Heval Ebûbekir wiha got; “Min bi xwe têkildarî vê mijarê bi rayedarên Tirkiye, konsolxane û balyozxaneyên wê re nîqaş kiriye. Nêrîn û nirxandinên Tirkiyeyê û rayedarên wê yên li ser vê mijarê ne yasayî û îdarî ne, belkû ewlekarî, siyasî û leşkerî ne. Ji ber vê yekê jî pêwîst dike ku aliyên peywendîdar hewl bidin vê dozê çareser bikin.”
