Amed – Serokê Heyva Sor a Kurd Dilgeş Îsa da zanîn ku 5 xebatkarên wan ên li Taxa Şêxmeqsûd dema karê xwe dikirin ji aliyê çeteyên HTŞ û SMOyê ve hatine revandin û bang li saziyên navneteweyî kir ku ji bo endamên wan bên berdan têkevin dewrê.
Çeteyên girêdayî HTŞ û SMOyê 6ê Çileyê êrîş li taxên Şêxmeqsûd û Eşrefiyê yên Helebê kirin. Di êrîşan de gelek sivîl hatin kuştin û sedhezaran welatî ji malên xwe hatin koçberkirin. Endamên Heyva Sora Kurd jî jî roja destpêka êrîşan û heya valakirina taxan li qadê ji bo alîkariya tendurustiya gel xebat dan meşandin. Piştî di 8ê Çileyê de agahî ji 5 endamên Heyva Sora Kurd yên li taxa Şêx Meqsûd dixebitîn qut bû, hat zanîn ku ev endam hatine revandin.
Yên hatine revandin tîmên tenduristiyê ne
Serokê Heyva Sor a Kurd Dilgeş Îsa diyar kir di 8ê Çileyê de, dema ku tîmên wan xwestin sivîl û birîndaran ji herêma şer derxin, hatine revandin û got: “Têkiliya me bi tîma me re qut bû. Me şopand ku endamên me, li gel welatiyên li taxa Şêxmeqsûd, hatin revandin û niha di destê çeteyên girêdayî HTŞ û SMOyê de ne.”
Nasnameya 3 xebatkaran eşkere bûn
Dilgeş Îsa, diyar kir ku wan nasnameya 3 xebatkarên ku hatine revandin eşkere kiriye û ev tişt gotin: “Li gorî agahiyên ketine destê me, li 2 endamên ku me nasnameya wan diyar nekiriye, bi giştî 5 xebatkaren me girtî ne. Navê endamên me yên ku hatine revandin wiha ye; ‘Yûsiv Henan Hemoko (Şofêrê Ambûlansê)’, ‘Ebdo Mihemed Mihemed (Hemşîr)’, Ramî Hisên El-Elî (Berpirsê Nûqteya Tenduristiyê ya Şêx Meqsûd).”
“Berpirsiyar Hikûmeta Şamê ye”
Dilgeş Îsa gumanên xwe yên li ser jiyana xebatkarên tenduristiyê parve kir û wiha got: “Sûcê li dijî ekîba tenduristiyê û gelê wê taxê, hatiye asta sûcên şer. Heke zirar bigihîje jiyana xebatkarên tenduristiyê, berpirsyarî ya hikûmeta Şamê ye.”
Dilgeş Îsa di berdewamiya axaftina xwe de bal kişand ser texrîbatên li taxên Şêxmeqsûd û Eşrefiyê yên Helebê hatine pêkanîn û wiha axivî: “Nexweşxaneya Xalid Fecer a li taxa Şêx Meqsûd bi awayekî hovane hatiye topbarankirin û xebatkarên tenduristiyê di bin şert û mercên dijwar de xizmet kirine. 119 birîndarên ji herêmê hatine derxistin, li nexweşxaneyên Bakur û Rojhilatê Sûriyeyê tên dermankirin û 10 birîndar jî ji bo dermankirinê derbasî nexweşxaneyên li Herêma Başûrê Kurdistanê hatin kirin.”
‘Em ji bo alîkariyê her tim amade ne’
Di dawiya axaftina xwe de Dilgeş Îsa de bal kişand ser şerê dom dike û wiha derbirî: “Bangawaziya me ew e ku êriş bên sekinandin. Em wek Heyva Sor a Kurd, xetereya koçberiyê dibînin, xetereya şer a giran dibînin. Niha pêwîst e ku Sûriye aram bibe. 15 sal in ku herêm û bi giştî Sûriye di nava şer de ye. Gelek penaberî çêbû. Niha li Bakur û Rojhilatê Sûriyeyê 10 kampên penaberan hene. Bi rastî jî li herêmê rewşeke zehmet a jiyanê heye. Gelek netew di nava Sûriyeyê û Bakur û Rojhilatê Sûriyeyê de dijîn. Heke êrîş li ser herêmê berdewam bikin, dê koçberî zêde bibe. Ev jî zehmetiyeke pir mezin e. Cîhan bi rastî jî nikare hesaba vê yekê bide. Ji bo vê yekê, wek Heyva Sor a Kurd, em dixwazin şer bê rawestandin. Ji bo xelaskirina birîndaran, mudaxeleya lezgîn, xizmeta civaka xwe; em li ser erka xwe ne. Em her demê ji bo her alîkariyê amade ne.”
Banga saziyên navneteweyî
Dilgeş Îsa bang li saziyên pêwendîdar kir ku bila ji bo parastina xebatkarên tenduristiyê yên hatine revandin têkevin dewrê û wiha pê de çû: “Komîteya Navneteweyî ya Xaça Sor (ICRC), Neteweyên Yekbûyî (NY), Ofîsa Koordînasyona Karên Mirovî (OCHA) û Heyva Sor a Erebî ya Sûriyeyê (SARC) bila erka xwe bi cih bînin.”
