Platforma Saziyên Demokratîk bi minasebeta 4ê Nîsanê Roja Rojbûna Rêberê Gelê Kurd Abdullah Ocalan û mihrîcana ku li Xalfetiyê pêk bînin li Amarayê daxuyanî da. Aktivîsta TJAyê Mulkiye Gulmez axivî û got: “Ji bo azadiya fîzîkî ya birêz Abdullah Ocalan divê em di 4ê Nîsanê de hevgirtinê xurtir bikin.”
Bi boneya 76emîn salvegera rojbûna Rêberê Gelê Kurd Abdullah Ocalan, dê di 3-4’ê Nîsanê de li navçeya Xelfetî ya Rihayê mihrîcan bê lidarxistin. Platforma Saziyên Demokratîk li pêş mala Rêberê Gelê Kurd Abdullah Ocalan daxuyanî dan. Şêniyên gund, Parlamentera DEM Partiyê Ceylan Akça, Hevşaredarên Xelfetiyê Saniye Bayram û Mehmet Karayilan beşdarî daxuyaniye bûn. Li dîwarên malê wêneyê Abdullah Ocalan daliqandin. Aktîvîsta Tevgera Jinên Azad (TJA) Mulkiye Gulmez daxuyanî xwend û got: “Di serî de jin, em li bendê ne ku her kes beşdarî çalakiyên 4’ê Nîsanê bibin. Hewceye hemû kes piştgiriyê bide meşa ciwanan a îro hatiye destpêkirin.”
Hevserokê Federasyona Komeleyên Hiqûq û Piştevaniya bi Malbatên Girtî û Hikûmxwaran re (TUHAD-FED) Kerem Canpolat jî anî ziman ku tecrîd hêj didome û got: “Birêz Ocalan di 27ê Sibatê de bang kir û xwest êdî dayik negirîn û ciwan neyên kuştin. Ji bo em destê birêz Ocalan xurt bikin, hewceye em xwedî li vê bangê derkevin. Îsal dê bibe sala berxwedan û azadiyê. Em banga tevlibûna mihrîcanê li tevahiya gelê xwe dikin. Birêz Ocalan îradeyeke mezin raber kir û ya dikeve ser milê me jî xwedîderketina li vê bangê ye. Birêz Ocalan gavek avêt û dora dewletê ye. Ji bo azadiya fîzîkî ya birêz Ocalan, hewceye di 4ê Nîsanê de em hevgirtina xwe xurttir bikin.”
Daxuyanî, bi çepikan bi dawî bû.
