Amed – Rojnameger Omer Tur ku yek ji rojnamegerên ku şahidiya kuştina Ugur Kaymaz û bavê wî kiribû girîngîya çapemenîya azad a di bûyerên wiha de bi bîr xist û got: “Eger me rastiya bûyera hovane ya kuştina Ugur Kaymaz û bavê wî dernexista holê û wêne belav nekira dê ev jî wek bi hezaran bûyer bihata bincilkirin.”
Ugur Kaymaz û bavê xwe Ahmet Kaymaz di 21ê Mijdara 2004an de li navçeya Qoserê ya Mêrdînê li ber mala xwe ji aliyê polîsan ve hatin kuştin. Ugur Kaymazê 12 salî bi 13 guleyan hatibû kuştin. Bedena wî ji guleyan bûbû serad. Polîsan piştî ku vê bûyera hovane pêk anî, çekên lûledirêj danîn ber serê Ugur û bavê wî. Medyaya alîgir bûyerê berovajî serwîs kir û bi nûçeyên derew, bûyerê xist stûyê PKKê. Her çend medyaya alîgir û waliyê Mêrdînê yê wê demê digotin, “Du terorîst hatin kuştin” jî lê Ajansa Nûçeyan a Dîcleyê (DÎHA), rastiyê derxist holê û nûçeyên medya alîgir û daxuyaniya walî derewand. Nûçegihanê DÎHAyê yê Mêrdînê Omer Tur roja bûyerê wêne û dîmenên rasteqîn ê Ugur Kaymaz û bavê wî Ahmet Kaymaz ji raya giştî re ragihand. Omer Tur bi nûçe û dîmenên ku belav dike, eşkere bû ku Ugur û bavê xwe sivîl in û bi awayek hovane hatine kuştin.
Rojnameger Omer Tur bi minasebeta salvegera 21emîn a kuştina Ugur û bavê wî axivî û şahidiya roja bûyerê vegot.
Di bûyerê de rol û girîngiya Çapemeniya Azad
Rojnameger Omer Tur qala roja wê bûyera hovane kir û got: “Buroya me ya DÎHAyê li Qoserê bû. Bes wê çaxê hê jî bandora faîlên nediyar berdewam dikir. Kes zêde newêribû biçe cihên bûyeran. Ez û hevalek xwe me bi lez û veşartî xwe gihand cihê bûyerê û nexwaşxaneyê, cenaze li nexweşxaneyê bûn. Me xwe gihand rêveberên Komeleya Mafên Mirovan (ÎHD). Wan jî nedizanî kuştî kî ne. Me li ser bûyerê lêkolîn kir. Çapemeniya alîgir berî ku bûyer were zelalkirin, li gorî daxuyaniya waliyê Mêrdînê nûçe serwîs kirin û bi sernav û manşetên wek, ‘Du terorîst hatine kuştin’ nûçe çêkirin. Me bîhîst ku yên hatine kuştin yek zarok e. Me got ne pêkane ku ev kes ‘endamê PKKê’ be. Parêzer û rêveberên ÎHDê li cihê karûbarên otopsiyê amade bûn; gotin ‘ew zarokek 12 salî ye, navê wî Ugur Kaymaz e û bi 13 guleyan hatiye kuştin. Yê din jî bavî wî Ahmet Kaymaz e. Ez bi lez li şefê xwe yê ofîsê geriyam, min got ku ew daxuyaniya hatiye dayîn şaş û her du kesên hatine kuştin jî sivîl û welatiyên ji Qoserê ne. Me nûçe amade kir û bi sernavê, ‘Li Qoserê 2 welatî hatin qetilkirin’. DÎHAyê piştî nûçe belav kir, nûnerên rojname û ajansên li vir hemû şaş man. Wê çaxê me ji wan re got ku hûn tenê nûçeya xwe bi gotina walî çêdikin lê hûn lêkolînê nakin. Tevî ku agahiyên rast hîn bûn û bûyer piştrast bû jî lê di dîsa di gotina xwe ya ‘2 terorîst’ de israr kirin û nûçe neguhurandin.”
‘Wênekêş û wêne rastiyê derxist holê’
Omer Tur destnîşan kir ku di berdewamiyê de jî wan dest ji ronîkirina bûyerê berneda û wiha got: “Her kes li wêneyê bûyerê û her du qurbaniyan digeriya. Me hewl da ku em xwe bigihînin malbatê. Lê belê polîsan malê û taxê hemû dorpêç kiribûn. Me hewl da ku em xwe bigihînin wêneyek Ugur Kaymaz. Ew wêneyê Ugur Kaymaz ku cilên dibistanê lê ne, bi zor û zehmetî peyda kir. Me ew roj heta nîvê hewl da wêne peyde bikin. Cara ewil ew wêneyê Ugur û bavê wî ajansa me belav kir. Wêne û wênekêşa me ji bo raya giştî ya Kurd û Kurdistanê gelek bi wate bû. Ew hezar bûyerên bi awayî ku qewimîn, ji ber wêne nebûn, hemû qurbanî hatin tawanbarkirin. Eger ew wênekeşa me nebûya, me wêne belav nekira wê bûyera Ugur Kaymaz û bavê wî jî wek bûyerên din bihatina veşartin. Wê ew bûyer jî bihata bincilkirin û raya giştî pê nedihesiya ku zarokek 12 salî bi 13 guleyan hatiye qetilkirin.”
