Serokatiya Daîreya Xizmêtên Jinan û Malbatê ya Şeredariya Bajarê Mezin a Amedê, Komxebata, “Çareserî û Astengiyên Binyatî ku di Têkoşîna Bi Tundiya Arasteyî Jinan de Tên Dîtin” ku wê 2 rojan bi dome li dar dixe. Di komxebatê de li ser rêbaza têkoşîna li dijî tundiyê nîqaş tên kirin.
Serokatiya Daîreya Xizmêtên Jinan û Malbatê ya Şeredariya Bajarê Mezin a Amedê, di çerçoveya bernameyên 25ê Mijdarê Roja Têkoşîna Tundiya li Dijî Jinan a Navneteweyî de li eywana Şeredariya Bajarê Mezin a Amedê Komxebata, “Çareserî û Astengiyên Binyatî ku di Têkoşîna Bi Tundiya Arasteyî Jinan de Tên Dîtin” ku wê du rojan bidome li dar xist. Hevşaredara Amedê Serra Bucak, Berdevka Meclîsa Jinan a DEM Partiyê Halîde Turkoglu, hevşeredarên navçeyên Amedê yên DEM Partiyê, saziyên jinan û gelek jin tev li konferansê bûn. Komxebatê bi deqîqeyek rêzgirtinê dest pê kir.
‘Em ê mekanîzmayên li dijî tundiyê zêdetir bikin’
Piştî rêzgirtinê Hevşeredara Bajarê Mezin a Amedê Sera Bucak ewilî axivî û bi lêv kir ku tundiya li dijî jinan her ku diçe zêdetir dibe û wiha got: “Tevî têkoşîn û xebata jinan jî tundiya li dijî jinan nehatiye rawestandin. Ev tundî ji polîtîkayên dewletê qut nîn in. Dewlet bi darazê faîlan û kujeran diparêze û ji ber polîtîkayên necezakirinê pêşî li tundiya li dijî jinan nayê girtin. Lê em ê tevî vê pergalê jî ji bo rêbazên xwe yên têkoşîna li dijî jinan ji nû ve bigirin dest û li ser serpehatiyên xwe yên têkoşînê rawestin. Me hewceyî bi komxebateke bi vî rengî dît. Di vê komxebatê de jî em ê li ser vê yekê nîqaşan bikin. Em ê bi hev re ji bo rêbazên têkoşîna hevpar gotûbêj û nîqaşan bikin. Bi vê komxebata du rojan em beşdarên hêja dê li ser rêbaza têkoşînê nîqaşan bikin. Em ê têkoşîna tundiya li dijî jinan bi berfirehî bigirin dest. Ez bi bawerim ku em ê bi hev re mekanîzmayên têkoşîna li dijî tundiyê zêdetir bikin. Em ê bi hev re tundiyê rawestînin.”
‘Pêwîstî bi komxebatê hebû’
Pişti Serra Bucak, Seroka Daîreya Xizmetên Jinan û Malbatê Ozden Sumer Gurbuz jî diyar kir ku komxebata wan dê du rojan bidome û got: “Li ser rêbaza têkoşîna li dijî tundiyê hewceyî bi guherînekê heye. Ji bo wê jî me xwest em komxebateke bi vî rengî bidin destpêkirin. Di vê komxebatê de em ê li ser têkoşîna tundiya li dijî jinan dikarin çi bikin, nîqaşan bikin.”
Bernameya komxebatê
Piştî axaftinan komxebat ji çapemeniyê re girtî berdewam kir. Di komxebata ku dê du rojan bidome de dê li ser mijarên wek, “Di têkoşîna li dijî tundiya li ser jinan de pirsigrêkên rû bi rû mayînê”, “Pirsgirêkên ku saziyên jinan pê re rû bi rû dimînin û sedem û encamên wê” û “Di têkoşîna li dijî tundiyê de pêşniyarên çareseriyê” nîqaş bên kirin.
