54 kesên ku li Wanê di çalakiya ji bo Rojava de hatibûn binçavkirin, piştî kar û barên li Midûriyeta Polîsan hatin berdan.
Platforma Ked û Demokrasiyê ya Wanê, di çarçoveya êrişên li ser Rojava de xwest meşekê li dar bixe, lê polîsan êrişî girseyê kir û tevî kesên hilbijartî 54 kes binçav kirin.
Kesên ku di nav wan de Hevşaredarên Bajarê Mezin ên Wanê Neslîhan Şedal û Abdullah Zeydan, Hevserokên Partiya Wekhevî û Demokrasiyê ya Gelan (DEM Partî) yên Wanê Gulşen Kurt û Veysî Dîlekçî, Hevserokên Partiya Herêmên Demokratîk (DBP) yên Wanê Gonul Ûzûnay û Cemal Demir, Hevserokê Şaxa Komeleya Mafên Mirovan (ÎHD) ya Wanê Mehmet Salîh Coşkûn, Hevserokên Şaxa Sendîkaya Kedkarên Perwerde û Zanistê (Egîtîm-Sen) yên Wanê Fûnda Demir û Murat Atabay, Serokê Baroya Wanê Sinan Ozaraz û aktivîstên Tevgera Jinên Azad (TJA) jî hebûn, piştî îfadeyên xwe yên li Midûriyeta Polîsan a Wanê hatin berdan.
Girseya ku li ber deriyê midûriyetê kom bibû û li benda binçavkiriyan bûn, bi dirûşmeya “Bijî berxwedana Rojava” wan pêşwazî kir.
Girseyê tevî kesên hatine berdan li ber Midûriyeta Polîsan daxuyanî da. Parlamenterê DEM Partiyê yê Wanê Mahmût Dîndar li vir axivî û destnîşan kir ku Midûriyeta Polîsan a Wanê bi binçavkirina kesên hilbijartî yên Wanê tişteke sosret kiriye. Mahmût Dîndar, bal kişand ser têkiliya Tirkiyeyê û HTŞê û got: “Dîsa aqilek ketiye dewrê ku Kurdan tune bike, serkêşiya vê jî AKP dike.”
Piştî daxuyaniyê girse bi dirûşmeyan belav bû.
