Sazîyê Ziwanê Kurdkî û Platformê Sazîyanê Demokratîkan, bi minasebetê Roşanê Ziwanê Kurdkî eşkerayîye da. Eşkerayîye de bala ant vengdayîşê Rayberê şarê Kurdî Abdullah Ocalanî yê û vat: “Seba welatêko demokratîk û aram hewce yo ke qanûnê bingeyinî ke vernîya azadîya ziwanê kurdkî asteng kenê, bêrê sererastkerdene, ziwanê kurdkî bibo ziwanê perwerdeyî û ziwanêko fermî.”
Sazîyê Ziwanê Kurdkî û Platformê Sazîyanê Demokratîkan, bi minasebetê 15ê Gulane Roşanê Ziwanê Kurdkî eşkerayîye da. Eşkerayîya ke Meydanê Şêx Seîdî de ameye kerdane, Hemserokê Pêro yê Partîya Herêmanê Demokratîkan (DBP) Keskin Bayindirî reyde zaf temsîlkarê partîyanê sîyasî, rêxistinanê komelê sivîlî û zaf hemwelatîyî amade bîyî. Eşkerayîye Hemserokê MED-DER Şukran Yakut wend.
‘Ziwanê tirkî û tirkkerdiş gedeyanê kurdan ser o yeno ferzkerdene’
Şukran Yakut asîmîlasyon, teda, zordayîşî yê ke kultur, ziwan û nasnameyê kurdan ser o qiseykerd û vat: “Seserra 21. de hema zî bi mîlyonan gedeyanê kurdan ser o polîtîkayê asîmîlasyonî bi hewayêko hovane yenê ramitene. Ziwanê tirkî û tirkkerdiş gedeyanê kurdan ser o yeno ferzkerdene, bi mîlyonan gedeyê kurdan kultur û ziwanê xo ra dûrî benê, bi ziwanê tirkî yenê perwerdekerdene. Goreyê peymananê mîyanneteweyîyan, nê tatbîqatê asîmîlasyonî sucê vera merdimî yê. Şarê kurdan destpêkê ronayîşê Komara Tirkîya ra heta nika bi tepş û nêzdîbîyayîşê dewlete sey asîmîlasyon, înkar, qirkerdiş û nêhesibnayîşî reyde rî bi rî mendo. Destpêkî ra heta nika vera nê nêzdîbîyayîşan nerazîbîyayîşê xo nawito û têkoşînê xo heta ewro zî dewam keno.”
‘Ocalan sebebê ganîkerdişê ruhê neteweyî yo haştîkar û komelêko demokratîk’
Şukran Yakut vengdayîşê Rayberê şarê Kurdî Abdullah Ocalanî yê “Haştî û Komelo Demokratîk” hard vîrd û wona dewam kerd: “Sey heme nîyadayîş û munaqaşeyanê bînan ê derheqê komelî de, munaqaşeyê hewanayîşê astengê vernîya kultur, ziwan û perwerdeyê bi ziwanê dayîke zî da destpêkerdene û daraxê cehd û wayîrvejîyayîşî yê seba ziwanî xurt kerd. Bawerîya ma est a ke no vengdayîşê Rayber Abdullah Ocalanî eynî wext de do bibo sebebê ganîkerdişê ruhê neteweyî yo haştîkar û komelêko demokratîk. Do vernîya garantîkerdişê nasname, xobîyayîş, statu û heqê sîyasî û huqûqî de rayîr akero. Seba caardişê nînan zî ma do daraxê tewr berzî de wayîrê vengdayîşê ‘Haştî û Komelê Demokratîk’ vejîyenê û têkoşînê xo yê seba averberdiş û xurtkerdişê ziwanê kurdkî her demî ra hîna hîra bikerê.”
Sebaki ziwanê kurdkî bibo ziwanê perwerdeyî û ziwanêko fermî vengdayîş
Şukran Yakut dewamê qiseykerdişê xo dê vat: “Ma do heme sazgeh û dezgehanê kurdan û demokratîkan reyde bi şîarê ‘Statuyê Kurdî, Perwerdeyo bi Kurdkî’ ke merheleya newîye de par dest pêkerdbî, dewam bikerê. Seba welatêko demokratîk û aram, hewce yo ke qanûnê bingeyinî ke vernîya azadîya ziwanê kurdkî asteng kenê, bêrê sererastkerdene, ziwanê kurdkî bibo ziwanê perwerdeyî û ziwanêko fermî.”
Eşkerayîye bi slogananê ke ameyî eştiş qedîya.
