25 TIRê hetkarî yê ke hetê Platformê Pawitiş û Piştîdayîşî Şaristanî yê Amedî ameyê komkerdene, Amed ra ver bi Pirsûs seba Kobanî ameyê erşawitene.
Çarçewaya “Kampanyaya Hetkarî seba Kobanî” ya hetê Platformê Pawitiş û Piştîdayîşê Şaristanî yê Amedî ameybî destpêkerdene, 25 TIRê hetkarî ameyê komkerdene. TIRê hetkarî Amed ra ver bi Kobanî kewtê rayîr. Erebeyan de kelûpelê sey awe, şit, mamayê gedeyan, betanîye, sobe û xida ca gênê.
Derheqê hetkarîyanî de ke ameyê komkerdene Merkezê Fuar û Mîyanneteweyî yê Mezopotamyayî de eşkerayî ameye dayene. Verfekê Platformî Mahsûm Çîya Korkmaz qisey kerd û dîyar kerd ke Rojava problemê lazimtîyanê bingeyîn ê gede, extîyar û cinîyan est o û vat: “Mîyanê di rojan de ma 25 TIRî hetkarî amade kerdê. Zereyê erebeyan de awe, mamayê gedeyan, sobe û kelûpelê bingeyinî est ê. Nê hetkarî seva ke biresê şaranê Kobanî yê ke têkoşînê cuye danê, kewtê rayîr.”
Eşkerayî ra pey TIRî seba ke şêrê Kobanî Amed ra ver Pirsûs kewtê rayîr.
