Serekê Amedsporî Nahît Erenî kombîyayîşê çapemenî de vengdayîşê yewîye terefgiranê Amedsporî rê kerd û wina vat: “Yew hedefê ma est o, o zî vejîyayîşê Super Lîgî yo. Ma do pêro pîya eqez serkewê.”
Serekê Amedsporî Nahît Eren, Sereka Dîyine Şeyda Arslantaş û Serekê Heyetê Îstîşareyî Metîn Kilavuzî derheqê rojevê Amedsporî de Tesîsanê Şehmus Ozer de kombîyayîşê çapamenî viraşt. Kombîyayîşî de derheqê averşîyayîşanê rojanê peyênan de, seba şampîyonîya Amedsporî, reaksîyonê vera Amedsporî û çîyê ke bêrê kerdene ameyê vatene.
‘A kûpa do bêra nê şaristanî’
Metîn Kilavuzî destpêkê kombîyayîşî de da zanayene ke amancê înan o yo ke emser Amedspor bibo şampîyon û vat: “Ma semedê maçê Umranîye xemgîn bîyê. Semedo ke mîlyonan verê xo dabî nê maçî, ma o waştişî înan bi ca nêard. Ma ozrê xo wazenê. Ma naye sey tengîyêka rayîrî vînenê la do a kupa bêra nê şaristanî.”
‘Ma do pîya serkewê’
Nahît Erenî zî îfade kerd ke destpêkê sezonî ra heta roja ewroyîne bi yew amancî xo amade kerdo û wina vat: “Ma do her hîrê maçanê xo yê peyênan bigîrê û bibê şampîyon, bawerîya ma û terefgiranê Amedsporî bi naye est a. Ma demêko muhîm ra derbas benê, wext wext rincanî virazîyenê. Sebebê ney zî planê maçan o. Vernîya ma de 3 maçî est ê, taximê ma amade yo ke serkewo. Keyeyê xo de ma pûanî vîndî kerdî û ma hesabê ney nêkerdbi. Na babete ser o ma xorîn fikirîyayê û vindertê. Vernîya ma de maçê Bandirmasporî est o, ma do serkewê û rayîrê xo ra şorê. Vengdayîşêkê ma terefgiranê ma rê est o. Wext wextê yewîye yo, her çiqas çîyê nebaşî benê zî ma do bi qerardarî nê rayîrî de şorê. Yew amancê ma est o, o zî vejîyayîşê Super Lîgî yo. Ma do ser kewê, ma do pîya serkewê. “
Kombîyayîş badê qiseykerdişî bi pers û cewaban qedîya.
