Goreyê raporanê îstîxbaratê DYA’yî, rejîmê Îranî seba pawitişê stokê xo yê uranyumî, berê tayê tunelan rijnayo û rayîrê ke şinê kampê nukleerî ameyê mayînkerdene. Goreyê pisporan Îran wazeno bi no hawa prosesê dewirkerdişê uranyumî derg bikero.
Krîzê nukleerî ke mabenê Dewletanê Yewbîyayeyan ê Amerîka (DYA) û Îranî de keweno qonaxêko newe. Goreyê agahîyanê îstîxbaratê DYA’yî ke çapemenîya Amerîka eşkera kerdê, Îran hewteyo peyîn de seba pawitişê stokanê xo ê zengînkerdişê uranyumî, tedbîrê ewleyî zêde kerdê.
Îran wazeno uranyum nika binê herre de bimano
Yeno dîyarkerdene ke Îran bi qestî berê tayê tunelan rijnayo û rayîrê ke şinê kampê uranyumî mayîn kerdê. Çimeyê îstîxbaratî dîyar kenê ke vera nê tedbîran, resayîşê nêzdî nêm ton zengînkerdişê uranyumî goreyê verê cû xeylî zehmetêr û astengêr bîyo.
Muzekkereyê rîyê Trumpî ra çetîn benê
No raporê îstîxbaratî, demêko ke nîqaşê peymana mabenê Serekê DYA’yî Donald TRump û Tehranî de ver bi peynîye şino de ame weşanayîş. DYA wazeno çarçewaya peymanêke de zengînkerdişê uranyumî yê Îranî dewir bigîro û îmha bikero. La goreyê çimeyan, tedbîrî ewleyî yê newe yê Îranî do caardiş û pawitişê peymane zehmetêr bikero.
‘Do vetişê uranyumî zehmet bibo’
Serekê verên ê Ofîsê Neqilkerdişê Materyalanê Nukleerî ê DYA’yî Scott Rock bale ante ke, eke no rapor raşt bo, vetiş û kontrolkerdişê stokê uranyumî do xeylî zehmetêr bo û vat ke na rewşe eşkena mîqdarê materyalanê ke bêrê destkewtişî ser o nezelalîye viraza.
Badê peymane zî dewirkerdişê uranyumî asan nîyo
Goreyê raporê îstîxbaratî, beşo tewr gird ê stokê uranyumê Îranî Kompleksa Nukleerî ê Îsfahanî gêno. Pisporî vanê ke mabenê DYA û Îranî de peymanêke bêro viraştiş zî vetişê uranyumî do lazimîyê operasyonanê teknîkî, pakkerdişê mayînan û muzekkereyan hîra bibo.
