Verfeka DEM Partî Ayşegul Dogan derheqê averşîyayîşanê peyênan de Merkezê Pêroyî yê DEM Partî de hedîseyê k rojeve de yê erjnayê û vat: “Tayê kesî vanê proses qedîyayo. Nê, tewrê heme astengan proses aver şono. Reyna Entegrasyono Demokratîk yê Sûrîye do Tirkîya zî xurt bikero.”
Verfeka DEM Partî Ayşegul Dogan Merkezê Pêroyî yê DEM Partî de averşîyayîşê ke rojeve de yê erjnayê û wina vat: “Ez do hem ser plananê partî yê neweyan ser o hem zî hedîseyanê ke rojeve de yê çend nuqtayan bîyara ziwan. Helwêstê ma yê vera xirabîye zaf zelal o. Şarê Tirkîya munaqeşeyê butçe û qiseykerdişê butçeyî temaşe kerdê. Çi heyf ke şarê Tirkîya badê qiseykerdişê peyênî şer zî dî. No bi xo mojneno ke çira serdemo newe de hewcedarîya ziwan û sîyasetêko newe est a.”
‘Ganî êdî qanûnê çareserîye bêrê ronayene’
Ayşegul Dogan bale ant prosesê Aştî û Komelê Demokratîkî zî ser o û wina qisey kerd: “No rojev tena rojevê DEM Partî nîyo. No rojevê heme Tirkîya yo. Her kes munaqeşe keno. La ma wazenê pozîtîf bêro munaqeşekerdene û nê munaqeşeyî hêvîyan xurt bikero. Ma vanê fikrê cîyayî, pêşnîyaz û rexneyî prosesî qels nêkenê. La hêrîşê ke bi amanc yenê kerdene, ê prosesî qels kenê. Ma eşkera kerd ke ma merheleya yewine pey de verdaye. Heyetê Merkezî yê DEM Partî gama dîyine erjnaye. No proses seba ma manaya rastkerdişê qanûnan û sîyasetê ke bi huqûqî yeno bihêzkerdene.”
‘Proses tewrê heme astengan aver şono’
Ayşegul Dogan bale ant persê ke girêdayeyê prosesî yenê persene zî û wina vat: “Persê ‘Proses qedîyayo, hêdî yo, eke aver şono senî aver şono…’ û zaf persê bînî yenê perskeredene. Her kes goreyê xo cewabê persanê derheqê prosesî de dano. La ma eşkenê zaf eşkera û zelal vajê ke proses tewrê her çî aver şono. Tewrê heme hêrîşan aver şono. Pawitişê komelkî zaf zêde yê. Goreyê pawitiş û waştişanê şarî proses hêdî şono. Seba naye ganî qanûnî bêrê rastkerdene û huqûq aver şêro. Komîsyonê Meclîsî 5ê tebaxe de ame awankerdene û a roje ra heta nika xebatanê xo domneno. Zaf kes û dezgehî goşdarî kerdê. Heta nika 20 kombîyayîşî kerdê.”
‘Ganî tu partî menfeetanê xo esas nêgîro’
Ayşegul Dogan da zanayene ke hewteyêk ra ver her partîyêka sîyasî cîya-cîya raporê xo pêşkêş kerdî û raporî bîyî sebebê munaqeşeyan û wina dewam kerd: “Fikrê partîyanê sîyasî ê seba çareserîya meseleyê kurdî de bi nê raporan êdî eşkera bîyê. Ganî demêko kilm de partîyî bingeyê qanûnanê ke hewcedarîya Tirkîya pê est a, înan ser o bibê yew. Ganî partîyê sîyasî nuqtayê ke ganî esas bêrê girewtene, înan ser o kom bibê û menfeetanê şarê Tirkîya esas bigîrê.”
‘Entegrasyono Demokratîk do Tirkîya zî demokratîk bikero’
Ayşegul Dogan vat: “Babetêka bîne rewşa Vakur û Rojhelatê Sûrîye ya. Ma zî nêzdî ra taqîb kenê û pêvînayîşanê dîplomatîk kenê. Ma bawer kenê ke Sûrîyeya demokratîke do Tirkîya zî demokratîk bikero û tesîrê xo Tirkîya ser o zî bikero. Ma sere de Mutabaqatê 10ê Adare û heme mutabaqatanê dîyalog û muzakereyî esas gênê û wazenê ke her çî bi dîyalog aver şêro.”
‘Hêrîşî bi plan ê’
Ayşegul Dogan tewr peyên bale ante hêrîşê cinsîyetperest ê vera sîyasetmedara kurd Leyla Zana ser o û vat: “No hêrîşêko bi plan û zanayîş yo. Seba ke nasnameyê Kurdîtîye yê Leyla Zana nê hêrîşî yenê kerdene. Nê hêrîşî bi tu awayî nêyenê qebulkerdene.”
