Baroyê Amedî seba serra newa ya edlî eşkerayî daye. Serekê Baroyî Abdulkadîr Guleç dîyar kerd ke ê hukmêko xoser û bêhetî wazenê û waşt ke girewteyê sîyasî yê kurdî bêrê veradayene.
Baroyê Amedî vernîya Dadgeha Amedî de seba serra newa ya edlî eşkerayî daye. Xeylê avûkatî beşdarê eşkerayî bîyê.
Serekê Baroyê Amedî Abdulkadîr Guleçî eşkerayî wende. Guleçî bale ant xoserbîyayîşê hukmî ser o û waşt hukm goreyê nê esasî bixebitîyo. Guleçî Serekê Baroyî yê Verênî Tahîr Elçî ke qezaya Sûrî de ame kiştene ard xo vîrî û vat: “No têkoşîn bi destê ey û embazanê ey o wext ameyo destpêkerdene. Ma do bi ê rihî têkoşîn bidê.”
Abdulkadîr Guleç derheqê prosesî de qisey kerd û kemaneyê ke vejeyê orte vatî û waşt no problem bi lez bêro çareserkerdene û wina vat: “Ganî Selahattîn Demîrtaş, Bekîr Kaya û embazê înan ê girewteyî veradîyê.” Guleçî bale ant rewşa Mustafa Karatepe ke 30 serrî hepisxane de mendbi û 7 aşmî ra ver amebi veradayene û di rojî ra ver riyê nêweşîya ra cuya xo vîndî kerdbî û vat: “Vengdayîşê ma o yo ke girewteyê nêweşî û heme girewteyê ke cezaya înan temam bîya, bi lez veradîyê û gamî bêrê eştene.”
Guleç peynîya eşkerayî de heme avûkatan rê serkewtiş waşt û hêvî kerd ke hukm goreyê prensîbanê bêhetî û xoser bixebitîyo.
