Karkerê mewsîmî ke binê germîya 45 derece de saete pancê serê sibayî ra heta saete heştî şandî binê tînca germ de heta peynîya mewsîmî firîngîyan huşk kenê, bi kedêka pîle pîzevêşan xebitîyenê.
Her serre des hezar karkerî hêgayan de xebitîyenê û karê ramitişî û ronayîşî kenê. La keda înan nêyena vînayene. Bi sebrêko pîl û kedêka pîle her roje binê germîya tînce de xebitîyenê. Nê karkeranê mewsîmî ra tayê firingîyan huşk kenê. Huşkkerdişê firingîyan mewsîmê hamnanî de dest pêkeno û heta sereyê payîzî dewam keno. No karo zehmet aşmanê tewr german de yeno kerdene. Karê huşkerdişê firingîyan hîna zaf Bursa, Îzmîr, Edene, Riha, Amed û tay şaristanan de yeno kerdene.
Pêserkerdişê firîngîyanê huşkkerdeyan ke no çend serrî yo Amed de bi hewayêko hîra yeno kerdene, emserr zî binê germîya zafe de dest pêkerd. Karkerê mewsîmî, firingîyê ke hêga ara antê pêser kardî reyde di felqe kenê, sole erzenê ci û qumaşê sentetîk ê ke erd ke ameyo rafînayene, uca ser o rafînenê ke huşk bibê.
Merheleyê ziwakerdiş û huşkkerdişî çend qonxan ra vîyareno. Firingîyê ke ametê ramitene, dima ke sûr benê, hêgayan ra kom kenê û kamyonan reyde anê qada huşkkerdişî. Dima ra kamyonan ra çadiran ser o rokenê. Bi desan karkerî ke firîngîyan felqe kenê, bi kardan dest bi felqekerdişî kenê. Karkerî înan reyêk de birnenê, kenê di felqe û çadir ser o rokenê. Dima ke ameyê felqekerdene û qumaşî ser o ameyê rafînayene, yenê solkerdene. Dima ra tînce ver de panc rojî yenê veradayene. Firingî panc rojî binê tînca germ de xeylê reyan yenê dermankerdene. Tewr peynî de firingîyê huşkkerdeyî bi baldarî yenê pêserkerdiş û dekenê torbeyan. Rengê firingîyan çend weş bo, kalîteya înan hende baş yena hesibanyene.
Her hamnanî bi seyan karkerê ramitişî yenê Amed ke nê karî bikerê. Rixmo ke germîya şaristanî normanê mewsîmî vîyartba zî, xeylê keyeyî ke Riha ra ameyê, mîyanê ci de cinî û gedeyê ciwan û extîyarî zî, saete 05:00î serê sibayî ra dest bi kar kenê û heta saete 20:00î şandî binê germîya zehmet de xebitîyenê.
Serre bi serre bereardiş vêş beno
Firingîyê ke Amed de yenê huşkkerdene her çenf Kurdîstan de nêyenê werdene zî, xeylê welatanê dinya de eleqeyêka girde vînenê. Firingîyê huşkkerdeyî Îngîlîstan de sey meze û Îtalya de zî sey sosê pîzzayî yenê werdene. Reyna serre bi serre tonajê firîngîyanê huşkkerdeyan vêşe beno û seba welatanê sey Rusya, Ewropa û Dewletê Yewbîyayeyî yê Amerîkayî rê yenê erşawitene.
