Hempeymana Cinîyan a Kurdîstanî îfade kerd ke girewtişê vernîya şîdetî karê yew hetî nîyo û vat: “Qetilkerdişê cinîyan o bêmabên tesîrêko pîl ewleyîya komelî ser o kerdo. Lazim o bilez yasaya pawitişê cinî û komelî bêra rastkerdene.”
Vernîya Baxçeyê Şaristanê Helebçeyî de Hempeymana Cinîyan a Kurdîstanî çarçewaya Gama 16 Rojanê Girewtişê Vernîya Şîdeto ke Cinîyan rê Yeno Kerdene, çalakîyêk kerd.
Çalakî de Layen Kuwêstan eşkerayîya Hempeymana Cinîyan a Kurdîstanî wend.
Eşkerayî de ame dîyarkerdene ke şîdetî bingeyê komelî herimnayo û wina vat: “Girewtişê vernîya şîdetî tena karê hetêkî nîyo. Bêmabên qetilkerdişê cinîyan ê Kurdîstanî tesîrêko pîl ewleyîya komelî ser o keno. Seba girewtişê vernîya nê kerdişan, ganî heme cehdî bêrê kerdene. Nimitişê daneyanê qetilkerdişê cinîyan û şîdetî xizmetê cinîyan nêkeno.”
Dewamê eşkerayî de ame dîyarkerdene ke ganî bilez hukmato newe bêro awankerdene û parlamento aktîf bibo û nê çîyî vatî: “Dimayê aktîfbîyayîşê parlamentoyî ganî bilez yasayanê taybet ê komel û cinîyan ser o xebate bêra kerdene.
Tewr peyên eşkerayî de ame dîyarkerdene ke ganî vatişê tarîkerdiş û hedefgirewtişî vera cinîyan nêrê kerdene, cinîyan rêze bêra girewtene û nê çîyî vatî: “Şîdeto elektronîk ê cinîyan ser o hîna zaf bîyo, lazim o wezaret û hetê wezîfedarî vernîya ney bigîrê û tedbîranê laziman bigîrê.”
