TJA seba Rayîrşîyayîşê Gemlîkî eşkerayîyêka nûştekî vila kerd û wina vat: “Bi heme renganê xo, bi vatiş û têkoşînê xo, ma Gemlîk de bêrê têhet. Seba aştî û azadîye, ma bibê yew.”
Têgêrayîşê Cinîyanê Azadan (TJA), seba azadîya fîzîkî ya Rayberê Şarê Kurdî Abdullah Ocalanî, do 19ê nîsane de ver bi Gemlîkî rayra şêra. TJA seba tewrbîyayîşê meşî eşkerayîyêka nûştekî weşanaye.
‘Azadîya Rayberê Şarê Kurdî tena seba kesêkî nîya’
TJA diyar kerd ke ruhê dewrî, beranê azadîya cinîyan û aştîya komelan akero û eşkerayî de wina vat: “Ma bi sloganê ‘Demê cinîye, demê azadîye yo’ vejîyayî rayîr; vera sîstemê pederşahî ke keda ma, beden û heyatê ma çin vîneno, ma rîyê xo reyna danê aştî. Çunke aştî; tena vindarnayîşê şerî nîyo, her wina awankerdişê heyatêko têduşt, azad û demokratîk o ke azadîya cinîyan esas gêno.
Ewro ma zanê ke; krîz û şeranê Rojhelatê Mîyanênî ra vîyartişi û akerdişê rayîranê çareserîya demokratîk, bi azadîya fîzîkî ya Rayberê Şaran bîrêz Abdullah Ocalanî mumkîn o. Azadîya fîzîkî ya bîrêz Ocalanî, tena seba kesêkî nîya; seba hêvîya aştîya şaran û awankerdişê komelê demokratîkî sewîyeyêka heyatî ya. Sey cinîysn, ma bi tecrubeya xo ya tarîxî vanê: Aştîya ke azadîya cinîye esas nêgêra, domdare nîya.”
‘Nika wextê dewrgirewtişê mîrasê xoverdayîşî yo’
TJA eşkerayîya xo de bal ant dejo giranî yê na herême ser o û wina domna: “Nika wextê dewrgirewtişê mîrasê xoverdayîş û komelkîkerdişê aştî yo. Bêrê ma vera xirabîya şerî cuye, vera teda azadîye û heqîqetî pîya bipawê.
Tîya ra vengdayîşê ma seba heme dezgehanê cinîyan ê Tirkîya, femînîstan û têgêrayîşanê cinîyan o: No têkoşîn tenê ê parçeyêk nîyo; têkoşînê hempar ê heme cinîyan o ke terefê cuyêka seypê û azad de yê. Ma bi cîyayîyanê xo mil bidê milê yewbînan, vatişanê xo bikê yew û bi xoverdayîşêko hempar, ma eşkenê aştîye pîya awan bikê. Seba berzkerdişê vengê aştî û hewanayîşê astengîyanê vernîya azadîye ; ma veng danê heme cinîyan ke 19ê nîsane de rayîrşîyayîşê ver bi Gemlîkî de ma pîya rayra şêrê. Bêrê, ma nê pêvînayîşê tarîxî de mil bidê milê yewbînan. Bi heme rengan, vatiş û têkoşînê xo, ma Gemlîk de bêrê têhet. Seba aştî û azadîye, ma bibê yew.”
