Cizîr de hetê qaymeqamtî ra fuarê kitaban ke tena weşanxaneyê tirkî beşdar bîyê, ame akerdee û welatijan vera çinbîyayîşê weşanxaneyanê Kurdkî reaksîyon mojna.
Dewleta tirke bi desan serrî yo ziwanê Kurdkî ser o polîtîkayanê asîmîlasyonî kena. Ge ziwanê Kurdkî yeno qedexekerdene ge verdibistanan de gedeyê kurdî yenê asîmîlekerdene. Serranê peyênan de sazgehê dewlete bi programanê cîya polîtîkayanê asîmîlasyonî domnena. Qezaya Cizîr ya Şirnexî de Qaymeqamtîya Cizîrî seba asîmîlasyonî û çinhesibnayîşê Kurdkî kewt mîyanê cehdan.
Weşanxaneyê Kurdkî nêameyê silaynayene
Kuçeyê Hunerî de bi beşdarîya 120 weşanxaneyan fuarê kitaban ê Cizîrî ameyo akerdene. Rixmo ke Cizîr şaristanêko Kurdewar o û heme welatijê tîya ra yî û Cizîr de manenê û bi Kurdkî qisey kenê zî kesanê ke nê programî amade kerdo, tena weşanxaneyê tirkî ardê fuarî. Tena 2 weşanxaneyê ke kitabanê Kurdkî roşenê zî bi têkilîyanê xo yê şexsî mîyanê organîzasyonî de ca gênê.
Bêyî ke destû biwazê fuarî akerdo
Qaymeqamtîya Cizîrî seba akerdişê fuarê asîmîlekerdişê gedeyanê kurd ganî seba cayî şaredarî ra destûr bigirewtêne la no çî nêkerdo. Goreyê agahîyanê ke Şaredarîya Cizîrî ra ma girewtê, qaymeqamtî tena seba agahdarkerdişî şaredarî rê nuşteyêk erşawito. No z^, persê, “Qaymeqam nê hêzî kamca ra gênê?” ano vîrê merdimî.
‘Seba ke kitabê Kurdkî çin ê, zerrîya ma şikîyaye’
Welatijê bi nameyê Erdal Bariş ke seba herînayîşê kitabanê Kurdkî ame fuarî vera çinbîyayîşê kitabanê Kurdkî reaksîyon mojna û wina vat: “Cayêko sey Cizîra Botan ke hetê kurdewarî ra aver şîyo, uca de weşanxaneyê Kurdkî çin ê, raşta zî zerrîya ma şikîyaye. Tîya de ganî kitabê Kurdkî û weşanxaneyê Kurdkî zî est bîyêne, ma nê kesanê organîzatoran rexne kenê.”
‘Nê kitabî kulturê ma ra dûrî yê’
Welatijê bi nameyê Fadil Tay ke qezaya Silopya ra yo, seba kitabanê Kurdkî verê xo dayo Cizîrî zî da zanayene ke ê şaristano ke girêdayeyê kulturê xo yo, uca de ciwîyenê û nerazîbîyayîşê xo îfade kerd: “Kitabê Kurdkî seba komelê ma xeylê muhîm ê la çi heyf ke tîya de kitabê Kurdkî çin ê. Ma tîya de vînenê ke zafanê kitabê kulturê ma nîyê, no kemaneyêko pîl o. Ma waştêne ke weşanxaneyê ma zî tîya de est bîyêne. Fikrêko baş o la hetê temsîlîyetî de problemî est ê.”
