Platformê Şubeyan ê KESK’î yê Wanî, bi amancê protestokerdişê hêrişanê vera wendekar û mamosteyan, vernîya awanîya xo ya Rêya Armûşî de çalakîyêk viraşt. Girseyo ke vernîya awanî de “zincîra merdiman” viraşt, dima ver bi Dibistana Ataturkî rayra şîyê.
Platformê Şubeyan ê KESK’î yê Wanî, seba ke hêrişanê vera wendekar û mamosteyan protesto bikê, vernîya awanîya sendîka de çalakîyêk organîze kerd. Girse vernîya awanî de ewilî “zincîra merdiman” viraşt û dima ver bi Dibistana Ataturkî rayra şîyê. Rayîrşîyayîşî de pankartê “Perwerde de şîdetî rê vaje nê” ame akerdene û sloganê “Dişmenê mamosteyan Yusuf Tekîn îstîfa” ameyê vatene. Badê rayîrşîyayîşî vernîya dibistane de eşkerayîyêka nûştekî ameye dayene. Xeylê mamoste û wendekarî tewrê nê rayîrşîyayîş û eşkerayî bîyî.
‘Çareserî polîsan de nîya, demokrasî de ya’
Eşkerayî hetê hemserekê Şubeyê Egîtîm Senî yê Wanî Murat Atabayî ra ameye wendene. Murat Atabayî dîyar kerd ke krîzê warê perwerdeyî bi metodanê fîzîkîyan yan zî bi tedbîranê polîsan çareser nêbenê û vat: “Çareserîya krîzê perwerdeyî, tena bi tedbîranê polîsan yan zî bi ewlekarîya fîzîkî mumkîn nîya. Çareserîya raşte, binê aştî de ke tede cîyayî sey zengînî yenê vînayene û xebateka demokratîke de ke tede her kes wayîrê vatiş o, nimite ya.”
‘Mertalo tewr bihêz aştî ya’
Murat Atabayî dîyar kerd ke seba pawitişê ameyoxê domanan, hewcedarî bi atmosferêko azad est o. Atabayî dîyar kerd ke aştî û demokrasî seba komelî “tercîhek” nîyo, “mecburîyetek” o û wina domna: “Aştî û demokrasî mertalê tewr bihêz ê ke do domananê ma çetebîyayîş, bêhêvîtî û şîdetî ra bipawê. Ganî prosesê perwerdeyî de her kes bibo wayîrê vatişî. Awankerdişê perwerdeyêkî ke tede heme cîyayî sey zengînî yenê qebulkerdene, şertê bingeyên ê aştî yo.”
Atabayî peynîya eşkerayîye de vat ke heta ke perwerde de bingehêko demokratîk û aştîyane nêbo, problemê komelkî çareser nêbenê. Badê eşkerayî girse heta saete 13:00î nobeta cuye girewt.
