Mamosta û rayberê sazîyanê ziwanê Kurdkî, amancê Meclîsê Cinîyan ê Ziwanê Kurdkî û polîtîkayê asîmîlasyonî dîyar kerd ke lazim o her qada ciwîyayîşî de ziwanê Kurdkî bêro qiseykerdene û vat: “Seba ke ziwanê ma bibo ziwano fermî, ma xoverdayîş û xebatanê xo kenê hîra.”
Ziwanê Kurdkî viraştişê cumhurîyeta Tirkîya ra hetanî ewro û nê 45 serranê peyênan de hertim bi polîtîkayê asîmîlasyonî reyde rî bi rî mendo. Tena asîmîlasyon ney, hertim bi qedexe, astengî û êrîşan reyde zî rî bi rî mendo. Seba ke ziwanê Kurdkî hîna şîn bibo û hîra bibo û bibo ziwanê perwerdeyî û statuyê ziwanê Kurdkî bêro şinasnayîş, xebatê sazîyanê ziwanê Kurdkî bêvindertene dewam kenê. Cinîyê ke saziyan û komeleyanê ziwanê Kurdkî de xebatan kenê, demêko derg bî ke Meclîsê Cinîyan ê Ziwanê Kurdkî awan kerdbî. Meclîsê Cinîyan ê Ziwanê Kurdkî Amed de kom bîyî û 9ê Adare de beşdarîya rayber û mamostayanê sazîyanê ziwanî reyde meclîsê xo şarî rê eşkera kerd.
Beyanatê Meclîsê Cinîyan ê Ziwanê Kurdkî
Vengdayîşê 27ê Sibate yê Rayberê Şarê Kurd Abdulah Ocalanî seba Aştî û Şarê Demokratîkî seba heme şaranê Rojhelatê Mîyanênî û bi taybetî zî seba ma cinîyan muhîm o. No vengdayîş ciwîyayîşêko newe ke heme rengê xo tede yê, pêşkêşê şaranê Rojhelatê Mîyanênî û bi taybetî cinîyan keno. Eynî wext de seserra 21. de Tirkîya û Rojhelatê Mîyanênî de berê viraştişê şarê demokratîkî akeno. Sey cinîyê zerrîwazê Ziwanê Kurdkî ma nê vengdayîşî qebul kenê û bi nê wesîleyî ma eşkera kenê ke ma do hewcedarîya mîsyon û berpirsîyarîya ke no vengdayîş ma ra wazeno, bîyarê ca.
Ganî şarê Kurd xo vîrî ra nêkero ke ziwan, ruh û ciwîyayîş o, nasname û xoşinasnayîş o, vîr û hişmendî yo, rumet û sereberzî yo. Dûrkewtişê ziwanî, dûrkewtişê rumetî yo. Ganî verê cû cinîyê Kurdî û dima heme şarê ma ewro ra dima vera nê polîtîkayê asîmîlasyonî ke bi seserran o ke bi hawayêko organîze yenê ramitene, redaksîyonê xo nîşan bidê û vajê êdî bes o.
- Ma do heqê perwerdeyê bi ziwanê dayîke bipawê: Seba ke ziwanê Kurdkî verdibistane ra hetanî unîversîte bibo ziwanê perwerdeyî, ma do xebatan biramê.
- Ma do eserdayîşê ziwanî yê cinîyan teşwîq bikerê: Ma do qadanê sey edebîyatê kurdkî, huner, medya û xebatanê akademîkî de estbîyayîşê cinîyan zêde bikerê.
- Ma do şuxulnayîşê ziwanê kurdkî qadanê pêroyîyan de vila bikerê
- Ma do hişmendîya ziwanî zêde bikerê
- Ma do hemkarîya mîyanneteweyî biqewet bikê
SEBA PAWITIŞ Û CIWÎYAYÎŞÊ ZIWAN, NASNAME Û KULTURÊ XO MA VENG DANÊ HER CINÎ KE BEŞDARÊ NÊ TÊKOŞÎNÎ BIBA!
Her çekuya ziwanê kurdkî xoverdayîşê ma yo! Eke Kurdkî biciwîyo, do şarê ma biciwîyo! Eke Kurdkî azad bibo, do cinî zî azad bibê!
