Rihane Loqo ard ziwan ke cinîyanê Sûrîye vera ferasetê neteweperest, dîndar, zayendperest û neteweyîyî têkoşînêko pîl kerdo û vat: ”Cinîyî Sûrîye de do qanûnêkê bingeyî yê neweyî yo ke înan çin hesibneno qebul nêkerê.”
Rihane Loqo rewşê Sûrîye û Rojawanî û hêrişê îşxalî yê Dewleta Tirk û cerganê ci ajansê ANF’î rê ercnayî.
Rihane Loqa pare kerd ke modelê Îdareyê Xoserî bi felsefeya Jin, Jiyan, Azadî ameyo ronayene û têdûştîya cinî û camêrdan û sîstemê hemserekîye paweno. Rihane vat: ”Şorişê Rojawanî zanistê Jineolojî esas keno. Binê sîwana ney de cinîyanê Surîye vera ferasetê neteweperest, dîndar, zayendperest û neteweyîyî têkoşînêko pîl kerdo. Şorişê Rojawanî sey Şorişê Cinîyan derbazê tarîxî bîyo. Têkoşînê cinîyan ê Surîye hema zî dewam keno. Nika amadekarîyê qanûnê bingeyî yê neweyî yenê kerdene. Cinîyî Surîye de do qanûnêkê bingeyî yê neweyî yo ke înan çin hesibneno qebul nêkerê. Ganî cinîyî qanûnê bingeyî yê neweyî awan bikerê. No seba Surîyeyêka demokratîke şert o.”
Cuya Azade de kom bibê
Rihane Loqo da zanayene ke Dewleta Tirk destpêkî ra nata Şorişê Rojawanî şexsê cinîyan de keno hedef û vat: ”Dewleta Tirk dişmena projeyê Neteweya Demokratîke ya. Dewleta Tirk xora tim cinîyan kena hedef. Rijîyayîşê rejîmê Surîye ra nata zî cinîyî yenê qetilkerdene û hedefkerdene. Ma kerdişanê HTŞ’î nêzdî ra teqîb kenê. Awankerdişê sîstemêko ke cinîyan esas keno asan nîyo. La ganî baş bizanîyo ke ma nê sîstemî ra do tawîz nêdê. Seba meseleyanê Surîye, Rojawan û cinîyan paradîgmaya Rayber Apoyî çare ya. Nika şerêko giran est o. Serkêşîya cinîyan de şerê estbîyayîşî verê cû zî amebi kerdene û DAIŞ amebi binvistene. Ez venga pêro kesan dana ke wayîrê felsefeya Jin, Jiyan, Azadî vejîyê û dormeyê têkoşînê cuya azade de kom bibê.”
