Welatîjanê Wanî ke derheqê 15ê Gulane Roja Roşanê Ziwanê Kurdkî de qisey kerd, bale ante polîtîkayanê asîmîlasyonî ser o û dîyar kerd ke Kurdkî hema zî qedexe ya û ganî ziwanê Kurdkî bêro naskerdene û bibo ziwanê perwerdeyî.
Bi pêşengîya Celadet Elî Berdirxanî de serra 1932î de Kovara Hawarî Şam de bi herfanê latînî ameye weşanayene. 15ê gulane serra 2026î de bi qerarê Têgêrayîşê Ziwan û Perwerdeyê Kurdkî (TZP Kurdî) sey “Roja Roşanê Ziwanê Kurdkî” ame îlankerdene. A roje ra nat 15ê gulane bi çalakîyanê cîyayan yeno pîrozkerdene. Welatijanê Wanî derheqê 15ê Gulane Roja Roşanê Ziwanê Kurdkî de ajansê ma rê behsê muhîmîya ziwanê Kurdkî kerd û waşt komelî kurdî ziwanê xo rê wayîr vejîyo.
‘Heq nêyeno waştiş heq yeno girewtiş’
Mehmet Geverî îfade kerd ke bi seserran o bingeyê ziwanê kurdkî est o û ganî şar her tim bi Kurdkî qisey bikero û biwano. Mehmet Geverî bale ant polîtîkaya asîmîlasyonî yê îqtîdarî ser o û vat: “Seke yeno vînayene ke Rojava, Rojhelat, Başûr û Vakur de Kurkdî ser o asîmîlasyon est o. Ganî şarê ma nê ferqî de bo û wayîrê ziwanê xo vejîyo. Heq nêyeno waştiş, yeno girewtiş.”
‘Kar û barê xo bi Kurdkî bikerê’
Yunus Uysal vat ke ganî kurdî bi ziwanê xo qisey bikerê û nê çî vatî: “Xeylê cinî û dayîkê ma gedeyanê xo reyde tirkî qisey kenê. Hinî zî zaf tay Kurdkî qisey kenê. Dayîkê ma ganî gedeyanê xo reyde Kurdkî qisey bikerê. Sewbîna ganî heme kes kar û baranê xo bi ziwanê xo bikerê.”
‘Kurdan rê çareyêk lazim o’
Hekîm Kaplanî dîyar kerd ke ziwanê Kurdkî hema zî qedexe yo û wina vat: “Tena ziwanê ma nê, heme çîyê ma qedexe yo. Lazim o kurdî heme hetan ra azad bê û serbest biciwîyê. Proseso ke est o ganî ser kewo û çareyêk bêro vînayîş. Seba kurdan tena wendegeh nê, ganî heme çîyê ma serbest bo.”
‘Nameyî bi Kurdkî yê la tirkî qisey kenê’
Omer Yalçinî zî waşt ke kurdî bi ziwanê xo qisey bikerê û vat: “Ganî Kurdkî bi qicanê xo bidê musnayene. Ewro çi heyf heme ca de qicê ma bi tirkî qisey kenê. Name bi Kurdkî yo la bi tirkî qisey kenê. Ma na rewşe ra eciz ê.”
‘Ganî ma bibê yew û heqanê xo bigîrê’
Abdulkerîm Hîtîtî îfade kerd ke bi Îngilîzkî, Franskî, Almankî perwerde est o, la bi Kurdkî çin o û wina vat: “Seba her kesî heq o, la seba kurdan çin o. Ganî ma bibê yew û heqanê xo bigîrê. Ma wazenê dewlete seba ziwanê Kurdkî game bierzo. Ziwanê ma bi qîymet o û ganî ma înkar nêkerê.”
‘Faşîstî hêrişê kurdan kenê’
Kadîr Tamaçî zî dîyar kerd ke ê rîyê faşîstan ra nêeşkenê dayîkanê xo reyde bi ziwanê xo qisey bikerê û wina vat: “Ma seba kar şinê metropolon, la faşîstî seba ke ma bi Kurdkî qisey kenê hêrişê ma kenê. Kurdkî ziwanê ma yê dayîke yo û ganî ma pê qisey bikerê.”
‘Nêbeno ke Kurdkî bêro înkarkerdene’
Emîn Tûnçî zî da zanayene ke ziwanê Kurdkî her tim bi û do her tim zî bibo, nêbeno ke înkarê kurdkî bêro kerdene û vengdayîşê wayîrvejîyayîşê Kurdkî kerd.
